mushir

maiñ ne us se ye kahā

ye jo das karoḌ haiñ

jahl kā nichoḌ haiñ

un kī fikr so ga.ī

har umiid kī kiran

zulmatoñ meñ kho ga.ī

ye ḳhabar durust hai

un kī maut ho ga.ī

be-shu.ūr log haiñ

zindagī kā rog haiñ

aur tere paas hai

un ke dard kī davā

maiñ ne us se ye kahā

tū ḳhudā kā nuur hai

aql hai shu.ūr hai

qaum tere saath hai

tere hī vajūd se

mulk kī najāt hai

tū hai mahr-e-sub.h-e-nau

tere ba.ad raat hai

bolte jo chand haiñ

sab ye shar-pasand haiñ

un kī khīñch le zabāñ

un kā ghoñT de galā

maiñ ne us se ye kahā

jin ko thā zabāñ pe naaz

chup haiñ vo zabāñ-darāz

chain hai samāj meñ

be-misāl farq hai

kal meñ aur aaj meñ

apne ḳharch par haiñ qaid

log tere raaj meñ

aadmī hai vo baḌā

dar pe jo rahe paḌā

jo panāh maañg le

us kī baḳhsh de ḳhatā

maiñ ne us se ye kahā

har vazīr har safīr

be-nazīr hai mushīr

vaah kyā javāb hai

tere zehn kī qasam

ḳhuub intiḳhāb hai

jāgtī hai afsarī

qaum mahv-e-ḳhvāb hai

ye tirā vazīr-ḳhāñ

de rahā hai jo bayāñ

paḌh ke un ko har koī

kah rahā hai marhabā

maiñ ne us se ye kahā

chiin apnā yaar hai

us pe jāñ-nisār hai

par vahāñ hai jo nizām

us taraf na jā.iyo

us ko duur se salām

das karoḌ ye gad.he

jin kā naam hai avaam

kyā baneñge hukmarāñ

tū ''yaqīñ'' hai ye ''gumāñ''

apnī to duā hai ye

sadr tū rahe sadā

maiñ ne us se ye kahā

main ne us se ye kaha

ye jo das karoD hain

jahl ka nichoD hain

un ki fikr so gai

har umid ki kiran

zulmaton mein kho gai

ye KHabar durust hai

un ki maut ho gai

be-shuur log hain

zindagi ka rog hain

aur tere pas hai

un ke dard ki dawa

main ne us se ye kaha

tu KHuda ka nur hai

aql hai shuur hai

qaum tere sath hai

tere hi wajud se

mulk ki najat hai

tu hai mahr-e-subh-e-nau

tere baad raat hai

bolte jo chand hain

sab ye shar-pasand hain

un ki khinch le zaban

un ka ghonT de gala

main ne us se ye kaha

jin ko tha zaban pe naz

chup hain wo zaban-daraaz

chain hai samaj mein

be-misal farq hai

kal mein aur aaj mein

apne KHarch par hain qaid

log tere raj mein

aadmi hai wo baDa

dar pe jo rahe paDa

jo panah mang le

us ki baKHsh de KHata

main ne us se ye kaha

har wazir har safir

be-nazir hai mushir

wah kya jawab hai

tere zehn ki qasam

KHub intiKHab hai

jagti hai afsari

qaum mahw-e-KHwab hai

ye tera wazir-KHan

de raha hai jo bayan

paDh ke un ko har koi

kah raha hai marhaba

main ne us se ye kaha

chin apna yar hai

us pe jaan-nisar hai

par wahan hai jo nizam

us taraf na jaiyo

us ko dur se salam

das karoD ye gadhe

jin ka nam hai awam

kya banenge hukmaran

tu yaqin hai ye guman

apni to dua hai ye

sadr tu rahe sada

main ne us se ye kaha