mustaqbil

aane vaalā hai bahut jald ek aisā ahd bhī

dahr ke hālāt-e-maujūd fanā ho jā.eñge

aur hī ho jā.eñge kuchh ye zamīn-o-āsmāñ

aur hī kuchh roz-o-shab sub.h o masā ho jā.eñge

rif.atoñ par har taraf chhā jā.egā zo.af o jumūd

arsh vaale mā.il-e-taht-us-surā ho jā.eñge

pastiyāñ kar leñgī tai saare maqāmāt-e-frāz

ḳhaak ke zarre surayyā tak rasā ho jā.eñge

azmat o zillat kā saarā imtiyāz uTh jā.egā

ek manzil meñ shahanshāh o gadā ho jā.eñge

ḳhaak meñ mil jā.egā sarmāya-dāroñ kā ġhurūr

ahl-e-naḳhvat rāhi-e-mulk-e-fanā ho jā.eñge

faqr-o-fāqa kī jagah le leñge itminān o aish

muflis o mazdūr āzād-e-balā ho jā.eñge

safha-e-hastī se miT jā.egā nām-e-zulm-o-jabr

ahl-e-istibdād sab be-dast-o-pā jā.eñge

hākim o mahkūm meñ baaqī na hogā koī farq

ek ahl-e-taḳht o ahl-e-boriyā ho jā.eñge

munhadim ho jā.egā dīvār-e-zindāñ ḳhud-ba-ḳhud

ahl-e-zindāñ qaid-e-mehnat se rahā ho jā.eñge

TuuT jā.eñgī qafas kī tīliyāñ ik aan meñ

chahchahoñ se bostāñ rañgīñ-navā jo jā.eñge

aane wala hai bahut jald ek aisa ahd bhi

dahr ke haalat-e-maujud fana ho jaenge

aur hi ho jaenge kuchh ye zamin-o-asman

aur hi kuchh roz-o-shab subh o masa ho jaenge

rifaton par har taraf chha jaega zoaf o jumud

arsh wale mail-e-taht-us-sura ho jaenge

pastiyan kar lengi tai sare maqamat-e-fraaz

KHak ke zarre surayya tak rasa ho jaenge

azmat o zillat ka sara imtiyaz uTh jaega

ek manzil mein shahanshah o gada ho jaenge

KHak mein mil jaega sarmaya-daron ka ghurur

ahl-e-naKHwat rahi-e-mulk-e-fana ho jaenge

faqr-o-faqa ki jagah le lenge itminan o aish

muflis o mazdur aazad-e-bala ho jaenge

safha-e-hasti se miT jaega nam-e-zulm-o-jabr

ahl-e-istibdad sab be-dast-o-pa jaenge

hakim o mahkum mein baqi na hoga koi farq

ek ahl-e-taKHt o ahl-e-boriya ho jaenge

munhadim ho jaega diwar-e-zindan KHud-ba-KHud

ahl-e-zindan qaid-e-mehnat se raha ho jaenge

TuT jaengi qafas ki tiliyan ek aan mein

chahchahon se bostan rangin-nawa jo jaenge