mustaqbil

tere liye meñ kyā kyā sadme sahtā huuñ

sañgīnoñ ke raaj meñ bhī sach kahtā huuñ

merī raah meñ maslahatoñ ke phuul bhī haiñ

terī ḳhātir kāñTe chuntā rahūñgā

tū aa.egā usī aas pe jhuum rahā hai dil

dekh ai mustaqbil

ik ik kar ke saare sāthī chhoḌ ga.e

mujh se mere rahbar bhī muñh moḌ ga.e

sochtā huuñ be-kār gila hai ġhairoñ kā

apne hī jab pyaar kā naatā toḌ ga.e

tere bhī dushman haiñ mere ḳhvāboñ ke qātil

dekh ai mustaqbil

jahāñ ke aage sar na jhukāyā maiñ ne kabhī

sifloñ ko apnā na banāyā maiñ ne kabhī

daulat aur ohdoñ ke bal par jo aiñThe

un logoñ ko muñh na lagāyā maiñ ne kabhī

maiñ ne chor kahā choroñ ko khul ke sar-e-mahfil

dekh ai mustaqbil

zulf kī baat kiye jaate haiñ

din ko yuuñ raat kiye jaate haiñ

chand aañsū haiñ unheñ bhī 'jālib'

nazar hālāt kiye jaate haiñ

tere liye mein kya kya sadme sahta hun

sanginon ke raj mein bhi sach kahta hun

meri rah mein maslahaton ke phul bhi hain

teri KHatir kanTe chunta rahunga

tu aaega usi aas pe jhum raha hai dil

dekh ai mustaqbil

ek ek kar ke sare sathi chhoD gae

mujh se mere rahbar bhi munh moD gae

sochta hun be-kar gila hai ghairon ka

apne hi jab pyar ka nata toD gae

tere bhi dushman hain mere KHwabon ke qatil

dekh ai mustaqbil

jahan ke aage sar na jhukaya main ne kabhi

siflon ko apna na banaya main ne kabhi

daulat aur ohdon ke bal par jo ainThe

un logon ko munh na lagaya main ne kabhi

main ne chor kaha choron ko khul ke sar-e-mahfil

dekh ai mustaqbil

zulf ki baat kiye jate hain

din ko yun raat kiye jate hain

chand aansu hain unhen bhi 'jalib'

nazar haalat kiye jate hain