musa ki talash

apne chehroñ pe sahrā ke raqsāñ bagūle liye

apne lab ko siye

apnī āñkhoñ meñ mahrūmiyoñ ko sameTe hue

apnī palkoñ kī sahmī huī chilmanoñ meñ

chīḳhtī tishnagī ko chhupā.e

zindagī terī ye zinda lāsheñ

reñgtī phir rahī haiñ

dar-ba-dar kūcha kūcha galī-dar-galī

az ufaq tā ufaq

koī iisā nafas

koī shañkar sifat

un ke chehroñ pe raqsāñ bagūle

un kī āñkhoñ kī mahrūmiyāñ

un kī palkoñ kī vo chīḳhtī tishnagī

chhīn le

toḌ de un ke lab kā sukūt-e-girāñ

aaj bār-e-digar

vaqt ko justujū hai

aise insān kī

jis kī bas ek zarb-e-asā se

chashma-e-āb-e-haivāñ ubal jaa.e

jāñ-ba-lab zindagī ke badan se

tishnagī dard ban kar nikal jaa.e

apne chehron pe sahra ke raqsan bagule liye

apne lab ko siye

apni aankhon mein mahrumiyon ko sameTe hue

apni palkon ki sahmi hui chilmanon mein

chiKHti tishnagi ko chhupae

zindagi teri ye zinda lashen

rengti phir rahi hain

dar-ba-dar kucha kucha gali-dar-gali

az ufaq ta ufaq

koi isa nafas

koi shankar sifat

un ke chehron pe raqsan bagule

un ki aankhon ki mahrumiyan

un ki palkon ki wo chiKHti tishnagi

chhin le

toD de un ke lab ka sukut-e-giran

aaj bar-e-digar

waqt ko justuju hai

aise insan ki

jis ki bas ek zarb-e-asa se

chashma-e-ab-e-haiwan ubal jae

jaan-ba-lab zindagi ke badan se

tishnagi dard ban kar nikal jae