na jaane kab likha jae

tahayyur kī fazāoñ meñ

koī aisā parinda hai

jo pakḌā.ī nahīñ detā

hai koī ḳhvāb aisā bhī

azal se hai jo an-dekhā

koī aisī sadā bhī hai

samā.at se varā hai jo

basārat kī hadoñ se duur ik manzar hai jo ab tak

tasavvur meñ nahīñ aayā

kahīñ kuchh hai

jo ik pal dil meñ aa Thahre

to jism-o-jān ke hone kā ik bain-e-havāla ho

jo gītoñ meñ utar aa.e

to is dhartī se niile āsmāñ tak vajd taarī ho

jo lafzoñ meñ rache to baat phūloñ kī tarah mahke

agar lamhoñ meñ dhaḌke to zamānoñ meñ sadā phaile

agar manzar ke andar ho

to bīnā.ī ko apnā haq adā karne kī jaldī ho

vo shāyad hai

ik aisī dāstāñ jo ruuh ke andar hai poshīda

ik aisī saañs jo siine kī tah meñ chhup ke soī hai

ik aisā chāñd jo aflāk se bāhar chamaktā hai

muqaddar hī badal jaa.e

use gar likh diyā jaa.e

hamāre darmiyāñ honā

tahayyur ki fazaon mein

koi aisa parinda hai

jo pakDai nahin deta

hai koi KHwab aisa bhi

azal se hai jo an-dekha

koi aisi sada bhi hai

samaat se wara hai jo

basarat ki hadon se dur ek manzar hai jo ab tak

tasawwur mein nahin aaya

kahin kuchh hai

jo ek pal dil mein aa Thahre

to jism-o-jaan ke hone ka ek bain-e-hawala ho

jo giton mein utar aae

to is dharti se nile aasman tak wajd tari ho

jo lafzon mein rache to baat phulon ki tarah mahke

agar lamhon mein dhaDke to zamanon mein sada phaile

agar manzar ke andar ho

to binai ko apna haq ada karne ki jaldi ho

wo shayad hai

ek aisi dastan jo ruh ke andar hai poshida

ek aisi sans jo sine ki tah mein chhup ke soi hai

ek aisa chand jo aflak se bahar chamakta hai

muqaddar hi badal jae

use gar likh diya jae

hamare darmiyan hona