نہ جانے کیوں

اب جو وہ پاس سے کترا کے گزر جاتے ہیں

بے خودی میں کوئی تقصیر ہوئی ہے شاید

اب جو وہ آنکھ ملاتے ہوئے شرماتے ہیں

ذوق آوارہ کی تشہیر ہوئی ہے شاید

اب وہ اگلا سا انہیں ذوق تکلم بھی نہیں

ان کے ترشے ہوئے ہونٹوں پہ تبسم بھی نہیں

یا تو وہ بار جوانی سے پریشان سے ہیں

یا انہیں چھیڑتی رہتی ہے محبت کی نظر

یا تمناؤں نے طوفان اٹھا رکھا ہے

یا کھٹکتی ہے کلیجے میں شرارت کی نظر

ورنہ یوں بنتی ہوئی بات بگڑتی ہے کبھی

جو نظر مل گئی اک بار وہ لڑتی ہے کبھی