na-muradi ki ek nazm

mujhe pahle lagtā thā

mere bhī kamre kī haiñ chaar dīvāreñ

aur ek dar hai

aur is dar ke bāhar

mirā ek ghar hai

aur is ghar ke bāhar mirī ek duniyā

ab ikkīs din se

isī ek kamre meñ

rozāna chaubīs ghanToñ se kuchh sā.ateñ kam

musalsal muqayyad

maiñ ye dekhtī huuñ

mire chāroñ jānib

faqat dar hī dar haiñ

sabhī dar khule haiñ

har ik dar ke bāhar

zamāna judā hai

kahīñ bain kartī subuksār hūreñ

kahīñ raqs karte barahna farishte

kahīñ sabz malbūs meñ zard rūheñ ki shāyad hayūle

kahīñ jism hī jism

jin meñ kabhī ruuh phūñkī ga.ī thī

magar ab vo kaTh-putliyāñ haiñ

jo ḳhud apnī Doreñ hilāte hue

ghup añdhere meñ utrī chalī jā rahī haiñ

kahīñ zahr piine se munkir hai suqrāt

aur bhiik meñ zindagī māñgtā hai

kahīñ par hai nero

vahī bāñsurī jo bajātā rahā shahr jaltā rahā

ab vo azhdar kī sūrat gale meñ hamā.il

shikanje ko aise kase jā rahī hai

ki nero kī āñkheñ

ubal kar jale shahr kī raakh par bah rahī haiñ musalsal

kahīñ hirniyāñ ek hī chaukḌī meñ

zamīñ āsmāñ ke qulābe milāne meñ

kab se magan qahqahe ret par mārtī haiñ

jahāñ par vahīñ phūl-ban khil uTheñ

aur majnūñ bhulā.e hue apnī lailā ko yaksar

chune phūl-ban se faqat surḳh kaliyāñ

kahīñ par zuleḳhā hai

jo nāḳhunoñ kī darāḌoñ meñ aTke hue

sa.ad kurte ke dhāgoñ ko

dāñtoñ se noche chalī jā rahī hai

karāhe chalī jā rahī hai

aur ik dar ke bāhar

jahāñ tū khaḌā hai

maiñ yak-bārgī us kī jānib lapaktī huuñ

dahlīz daldal hai

daldal kī kyā ho bayāñ be-karānī

falak is meñ Duube to vāpas na ubhre

mujhe pahle lagta tha

mere bhi kamre ki hain chaar diwaren

aur ek dar hai

aur is dar ke bahar

mera ek ghar hai

aur is ghar ke bahar meri ek duniya

ab ikkis din se

isi ek kamre mein

rozana chaubis ghanTon se kuchh saaten kam

musalsal muqayyad

main ye dekhti hun

mere chaaron jaanib

faqat dar hi dar hain

sabhi dar khule hain

har ek dar ke bahar

zamana juda hai

kahin bain karti subuksar huren

kahin raqs karte barahna farishte

kahin sabz malbus mein zard ruhen ki shayad hayule

kahin jism hi jism

jin mein kabhi ruh phunki gai thi

magar ab wo kaTh-putliyan hain

jo KHud apni Doren hilate hue

ghup andhere mein utri chali ja rahi hain

kahin zahr pine se munkir hai suqraat

aur bhik mein zindagi mangta hai

kahin par hai nero

wahi bansuri jo bajata raha shahr jalta raha

ab wo azhdar ki surat gale mein hamail

shikanje ko aise kase ja rahi hai

ki nero ki aankhen

ubal kar jale shahr ki rakh par bah rahi hain musalsal

kahin hirniyan ek hi chaukDi mein

zamin aasman ke qulabe milane mein

kab se magan qahqahe ret par marti hain

jahan par wahin phul-ban khil uThen

aur majnun bhulae hue apni laila ko yaksar

chune phul-ban se faqat surKH kaliyan

kahin par zuleKHa hai

jo naKHunon ki daraDon mein aTke hue

sad kurte ke dhagon ko

danton se noche chali ja rahi hai

karahe chali ja rahi hai

aur ek dar ke bahar

jahan tu khaDa hai

main yak-bargi us ki jaanib lapakti hun

dahliz daldal hai

daldal ki kya ho bayan be-karani

falak is mein Dube to wapas na ubhre