na-tawan dosh par shaal

aur ab merī moñchheñ purāne sweater kī udhḌī huī safed uun

piile kāġhaz meñ rakkhī siyah film aur thūk-Dibiyā meñ band

terī maañ ke ghane baal

jinheñ chūmte chūmte maiñ ne rāteñ tirī soch meñ

ā.inoñ jaise barāmdoñ kī munaqqat safedī pe mal deñ

jahāñ bain mañDlā rahe the

jahāñ qahr kī sub.h aate hī saare Stethoscope

saañp ban jā.eñge

aur bad-atvār narsoñ kī āñkhoñ ke sūrāḳh

kiiḌe makoḌoñ kī āmāj-gāh

mire nā-tavāñ dosh par shaal

aur tū shamshād-qad āhanī jism siine meñ

ajdād kā ilm maujoñ kā shor

dabā kar mire kañdhe aur maañ ke pair

māthe kā bosa ki jannat ke phūloñ kā ras

kuchh raqam de ke būḌhe muhāfiz ko maiñ ne kahā thā ki ye ghaas to

saaf kar do

kahīñ qabr nannhī sī chhup hī na jaa.e

aur ab meri monchhen purane sweater ki udhDi hui safed un

pile kaghaz mein rakkhi siyah film aur thuk-Dibiya mein band

teri man ke ghane baal

jinhen chumte chumte main ne raaten teri soch mein

aainon jaise baramdon ki munaqqat safedi pe mal den

jahan bain manDla rahe the

jahan qahr ki subh aate hi sare Stethoscope

sanp ban jaenge

aur bad-atwar narson ki aankhon ke suraKH

kiDe makoDon ki aamaj-gah

mere na-tawan dosh par shaal

aur tu shamshad-qad aahani jism sine mein

ajdad ka ilm maujon ka shor

daba kar mere kandhe aur man ke pair

mathe ka bosa ki jannat ke phulon ka ras

kuchh raqam de ke buDhe muhafiz ko main ne kaha tha ki ye ghas to

saf kar do

kahin qabr nannhi si chhup hi na jae