nai ki hajamat

koī hajjām kī dūkāñ pe aayā

aur ik bachche ko apne saath laayā

kahā jaldī se merā shave kar do

phir is bachche ke sar se baal kaaTo

yaqīñ hai das minute se pahle lauTūñ

maiñ cafeteria meñ chaa.e pī luuñ

vahāñ ik dost merā muntazir hai

bulāyā chaa.e par aaj us ne phir hai

vo fauran chal diyā dāḌhī muñDā kar

usī kursī pe laḌke ko biThā kar

vo jab kuchh der tak vāpas na aayā

diyā naa.ī ne bachche ko dilāsā

na ronā abbā jaan aate hī hoñge

ki jaanā hai makān aate hī hoñge

ye sun kar us ne jeboñ ko TaTolā

chane aur kishmisheñ kuchh khā ke bolā

ham un ke vāste rone lage kyuuñ

hamāre baap vo hone lage kyuuñ

tumhāre bhaa.ī yā bahnoī haiñ phir

kahā hajjām ne haiñ kaun āḳhir

nahīñ rishta to vo laate tumheñ kyuuñ

chachā hoñge nahīñ to hoñge māmūñ

vo bolā ham galī meñ khelte the

bulā kar vo hameñ laa.e ye kah ke

tumhāre baal kitne baḌh ga.e haiñ

ye collar hai nā is par chaḌh ga.e haiñ

cating achchhī karā dūñgā tumhārī

ḳhalīfa haiñ mire bachpan ke sāthī

ye saare be-tuke chhaT jā.eñge baal

yahāñ par muft meñ kaT jā.eñge baal

kahā naa.ī ne achchhā yak na do shud

bas ab uḌ jaao tum bhī beTe hud-hud

koi hajjam ki dukan pe aaya

aur ek bachche ko apne sath laya

kaha jaldi se mera shawe kar do

phir is bachche ke sar se baal kaTo

yaqin hai das minute se pahle lauTun

main cafeteria mein chae pi lun

wahan ek dost mera muntazir hai

bulaya chae par aaj us ne phir hai

wo fauran chal diya daDhi munDa kar

usi kursi pe laDke ko biTha kar

wo jab kuchh der tak wapas na aaya

diya nai ne bachche ko dilasa

na rona abba jaan aate hi honge

ki jaana hai makan aate hi honge

ye sun kar us ne jebon ko TaTola

chane aur kishmishen kuchh kha ke bola

hum un ke waste rone lage kyun

hamare bap wo hone lage kyun

tumhaare bhai ya bahnoi hain phir

kaha hajjam ne hain kaun aaKHir

nahin rishta to wo late tumhein kyun

chacha honge nahin to honge mamun

wo bola hum gali mein khelte the

bula kar wo hamein lae ye kah ke

tumhaare baal kitne baDh gae hain

ye collar hai na is par chaDh gae hain

cating achchhi kara dunga tumhaari

KHalifa hain mere bachpan ke sathi

ye sare be-tuke chhaT jaenge baal

yahan par muft mein kaT jaenge baal

kaha nai ne achchha yak na do shud

bas ab uD jao tum bhi beTe hud-hud