nakaam aarzu

hayā roke thī ab tak kuchh na un ke rū-ba-rū niklī

bahut chheḌā dil-e-muztar ko tab ye guftugū niklī

sunā karte the duniyā-bhar ke qisse ham-nashīnoñ se

jab apnā ḳhud qadam pahuñchā to bas ik aarzū niklī

ki ham har tarah se jis ke haiñ vo ab bhī hamārā ho

magar afsos hai apne muḳhālif us kī ḳhū niklī

rahā vo umr-bhar ġhairoñ pe maa.il jaan aur dil se

mohabbat jo hamāre haq kī thī vo chār-sū niklī

jafāoñ ke evaz meñ kiiñ vafā.eñ har ghaḌī ham ne

magar is be-asar dil se mohabbat kī na bū niklī

natīja kyā vo apnī haT ke puure baat ke ziddī

pashemāñ ham hue bekār saarī justujū niklī

jale ḳhāmosh mānind-e-sham.a nā-kāmiyābī par

magar ban kar bagūla āh-e-pur-ġham kū-bakū niklī

isī hasrat meñ ik din mar ga.e jhagḌā chukā apnā

magar sad āfrīñ ai aarzū dil se na tū niklī

pas-e-murdan bhī dil meñ Tiis sī lag rah ga.ī baaqī

kiyā tashḳhīs sab ne ġham magar vo aarzū niklī

haya roke thi ab tak kuchh na un ke ru-ba-ru nikli

bahut chheDa dil-e-muztar ko tab ye guftugu nikli

suna karte the duniya-bhar ke qisse ham-nashinon se

jab apna KHud qadam pahuncha to bas ek aarzu nikli

ki hum har tarah se jis ke hain wo ab bhi hamara ho

magar afsos hai apne muKHalif us ki KHu nikli

raha wo umr-bhar ghairon pe mail jaan aur dil se

mohabbat jo hamare haq ki thi wo chaar-su nikli

jafaon ke ewaz mein kin wafaen har ghaDi hum ne

magar is be-asar dil se mohabbat ki na bu nikli

natija kya wo apni haT ke pure baat ke ziddi

pasheman hum hue bekar sari justuju nikli

jale KHamosh manind-e-shama na-kaamiyabi par

magar ban kar bagula aah-e-pur-gham ku-baku nikli

isi hasrat mein ek din mar gae jhagDa chuka apna

magar sad aafrin ai aarzu dil se na tu nikli

pas-e-murdan bhi dil mein Tis si lag rah gai baqi

kiya tashKHis sab ne gham magar wo aarzu nikli