nala-e-be-asman

maiñ kaise batā.ūñ tum batāo

kis tarah ye din guzar rahe haiñ

tauhīn haqārateñ tanaffur

kis kis se nibāh kar rahā huuñ

yuuñ faiz-e-ḳhirad se bahra-var huuñ

har ek fareb-e-vahm taj ke

is raat ye sochne lagā huuñ

maiñ mo'taqid-e-panāh hotā

itnā to na rū-siyāh hotā

shukr aur shikāyateñ duā.eñ

mere liye koī āstāna

tāsīr-dah-e-fuġhāñ nahīñ hai

juz jabr-e-nafas ye zindagānī

tum ko to ḳhabar hai kuchh nahīñ hai

har rishta jahāñ kā iftirā hai

har jhuuT yahāñ kā haq-numā hai

tum ko to ḳhabar hai is jahāñ meñ

dil kā koī āshnā nahīñ hai

dil kā koī aasrā nahīñ hai

ik tum the so tum bhī chhup ga.e ho

ab merā koī ḳhudā nahīñ hai!

main kaise bataun tum batao

kis tarah ye din guzar rahe hain

tauhin haqaraten tanaffur

kis kis se nibah kar raha hun

yun faiz-e-KHirad se bahra-war hun

har ek fareb-e-wahm taj ke

is raat ye sochne laga hun

main mo'taqid-e-panah hota

itna to na ru-siyah hota

shukr aur shikayaten duaen

mere liye koi aastana

tasir-dah-e-fughan nahin hai

juz jabr-e-nafas ye zindagani

tum ko to KHabar hai kuchh nahin hai

har rishta jahan ka iftira hai

har jhuT yahan ka haq-numa hai

tum ko to KHabar hai is jahan mein

dil ka koi aashna nahin hai

dil ka koi aasra nahin hai

ek tum the so tum bhi chhup gae ho

ab mera koi KHuda nahin hai!