nani ka pandan

duniyā meñ be-misāl hai naanī kā pandān

vābasta us kī zaat se hai ek dāstān

peñdā alag hai jis se bañdhā ek taar hai

sar-posh kā bhī biich se sīna-figār hai

ashyā-e-ḳhurdanī kī bhī is meñ qatār hai

naanī ko is se shaġhl meñ lutf-e-bahār hai

mumkin nahīñ ki is se judā hoñ vo ek aan

duniyā meñ be-misāl hai naanī kā pandān

katthe meñ Duubī dekhiye rāshan kī hai rasīd

aksar isī meñ noToñ kī miTTī huī palīd

paisoñ kī poTlī bhī mile is meñ kyā ba.iid

is kā vajūd sab ke liye hai bahut mufīd

vāqif hai us ke jauhar-e-zātī se ḳhāndān

duniyā meñ be-misāl hai naanī kā pandān

kulhiyoñ ke badle chīnī ke TuuTe piyāle haiñ

kāfūr hiiñg soñf pachīsoñ masāle haiñ

bīsoñ baras ke chand purāne risāle haiñ

kuchh khet kī rasīdeñ haiñ phaTe qabāle haiñ

naanā ke kuchh ḳhutūt baḌhāte haiñ is kī shaan

duniyā meñ be-misāl hai naanī kā pandān

bastī ke sab buzurg bhī mil baiTheñ gar baham

mushkil se is kī umr koī kar sake raqam

itnī sī baat hai jo 'zakī' jānte haiñ ham

naanī jise sunātī haiñ aksar ba-chashm-e-nam

naanī kī naanī ne bhī lagā.e the is se paan

duniyā meñ be-misāl hai naanī kā pandān

duniya mein be-misal hai nani ka pandan

wabasta us ki zat se hai ek dastan

penda alag hai jis se bandha ek tar hai

sar-posh ka bhi bich se sina-figar hai

ashya-e-KHurdani ki bhi is mein qatar hai

nani ko is se shaghl mein lutf-e-bahaar hai

mumkin nahin ki is se juda hon wo ek aan

duniya mein be-misal hai nani ka pandan

katthe mein Dubi dekhiye rashan ki hai rasid

aksar isi mein noTon ki miTTi hui palid

paison ki poTli bhi mile is mein kya baid

is ka wajud sab ke liye hai bahut mufid

waqif hai us ke jauhar-e-zati se KHandan

duniya mein be-misal hai nani ka pandan

kulhiyon ke badle chini ke TuTe piyale hain

kafur hing sonf pachison masale hain

bison baras ke chand purane risale hain

kuchh khet ki rasiden hain phaTe qabaale hain

nana ke kuchh KHutut baDhate hain is ki shan

duniya mein be-misal hai nani ka pandan

basti ke sab buzurg bhi mil baiThen gar baham

mushkil se is ki umr koi kar sake raqam

itni si baat hai jo 'zaki' jaante hain hum

nani jise sunati hain aksar ba-chashm-e-nam

nani ki nani ne bhi lagae the is se pan

duniya mein be-misal hai nani ka pandan