naraazgi

merī jaañ tumhārī ye nārāzgī mere siine meñ chubhte hue kab mirī zindagī ko nigal jā.egī is kā koī bharosa nahīñ hai

mire dostoñ kī nashisteñ to aisī kabhī bhī nahīñ thiiñ

ki gar saath baiTheñ to daarū kī botal ke khulne kī naubat bhī ho

ye ajab bhī nahīñ hai ki maiñ āj-kal mere marne kī jaldī meñ piine lagā huuñ

ajab to ye hai merī kaTtī huī umr baaqī bachī umr kī fikr meñ kab guzarne lagī ye pata tab chalā jab tire faisle merī marzī se yaksar judā tai hue

jab mire chāhne vaale kahne lage bas bahut ho chukā ye bachī rum hamāre liye aa.ī hai jaao kamre meñ jaao davā.ī piyo

umr shāyad kisī zindagī se kisī maut tak kā bhayānak safar hai jo ek hī zamān-o-makāñ meñ Thahar kar hī kaT jā.egā

is meñ apnī jagah mutma.in rah sako to ye rasta bhī pairoñ ke nīche se ḳhud hī sarak jā.egā

umr shāyad koī jāgte haal kā āfrīñ ḳhvāb hai jis meñ rahte hue aañkh thak jā.egī aur phir bistar-e-marg par jā ke so jā.egī

aañkh khul jā.egī maut ho jā.egī

ab maiñ āḳhir jo marne kī sūrat pe huuñ

to maiñ ye sochtā huuñ ki maiñ merī fitrat ko zinda rakhūñ

ya.anī jaisā thā maiñ ab maiñ vaisā rahūñ

terī nārāzgī bhī kabhī kam na ho

umr jitnī bachī hai vo ghaTtī rahe

merī kaTtī rahe

meri jaan tumhaari ye naraazgi mere sine mein chubhte hue kab meri zindagi ko nigal jaegi is ka koi bharosa nahin hai

mere doston ki nashisten to aisi kabhi bhi nahin thin

ki gar sath baiThen to daru ki botal ke khulne ki naubat bhi ho

ye ajab bhi nahin hai ki main aaj-kal mere marne ki jaldi mein pine laga hun

ajab to ye hai meri kaTti hui umr baqi bachi umr ki fikr mein kab guzarne lagi ye pata tab chala jab tere faisle meri marzi se yaksar juda tai hue

jab mere chahne wale kahne lage bas bahut ho chuka ye bachi rum hamare liye aai hai jao kamre mein jao dawai piyo

umr shayad kisi zindagi se kisi maut tak ka bhayanak safar hai jo ek hi zaman-o-makan mein Thahar kar hi kaT jaega

is mein apni jagah mutmain rah sako to ye rasta bhi pairon ke niche se KHud hi sarak jaega

umr shayad koi jagte haal ka aafrin KHwab hai jis mein rahte hue aankh thak jaegi aur phir bistar-e-marg par ja ke so jaegi

aankh khul jaegi maut ho jaegi

ab main aaKHir jo marne ki surat pe hun

to main ye sochta hun ki main meri fitrat ko zinda rakhun

yani jaisa tha main ab main waisa rahun

teri naraazgi bhi kabhi kam na ho

umr jitni bachi hai wo ghaTti rahe

meri kaTti rahe