nashte ki mez par

palak-navāz būḌhe vāldain kī nigāh

ahl-e-ḳhāndān par paḌe

to duur ufuq kī ghāTiyoñ se

sub.h

apne rang-o-nūr se ladī-phañdī nikal paḌe

makāñ jahāñ muqīm būḌhe vāldain hoñ

vahāñ ruke

ruke to apnā sone jaisā ruup us makāñ pe vaar de

makāñ ke saare zang ko utaar de

ye log to 'azīm shahr haiñ

'azīm shahr kā qadīm andarūn haiñ

yahāñ vahāñ thaḌe haiñ

jin pe log baiTh kar

tamām din kī raakh ko uḌā sakeñ

zarā sā hañs sakeñ

zarā sā apne aap ko rulā sakeñ

ye log to sarā.e kī kalīd haiñ

jahāñ pe duniyā vaale ik sukūñ kī raat kaaT leñ

jo chāroñ or ghertā hai vo muhīt paaT leñ

ye log to ḳhalā kī saql haiñ

falak kā rang haiñ

agar na in kā saath ho

na dhuup ho kiran-bharī

falak na nīl-rang ho

ye kaun haiñ

ki jin kī 'itr se bharī havā

ki jin kā 'itr se bharā vujūd 'aks-rez hai

kahāñ se aa rahī haiñ

arġhanūn kī dhuneñ

ye arġhavānī baaġh hai ki

nāshte kī mez hai

nazār kam-badan

jo ek qaash sañgtare kī nāshte kī mez se uThā.eñ

to phaloñ meñ ras paḌe

jo dhīre se zarā muskurā.eñ

saarā ḳhāndān hañs paḌe

palak-nawaz buDhe waldain ki nigah

ahl-e-KHandan par paDe

to dur ufuq ki ghaTiyon se

subh

apne rang-o-nur se ladi-phandi nikal paDe

makan jahan muqim buDhe waldain hon

wahan ruke

ruke to apna sone jaisa rup us makan pe war de

makan ke sare zang ko utar de

ye log to 'azim shahr hain

'azim shahr ka qadim andarun hain

yahan wahan thaDe hain

jin pe log baiTh kar

tamam din ki rakh ko uDa saken

zara sa hans saken

zara sa apne aap ko rula saken

ye log to sarae ki kalid hain

jahan pe duniya wale ek sukun ki raat kaT len

jo chaaron or gherta hai wo muhit paT len

ye log to KHala ki saql hain

falak ka rang hain

agar na in ka sath ho

na dhup ho kiran-bhari

falak na nil-rang ho

ye kaun hain

ki jin ki 'itr se bhari hawa

ki jin ka 'itr se bhara wujud 'aks-rez hai

kahan se aa rahi hain

arghanun ki dhunen

ye arghawani bagh hai ki

nashte ki mez hai

nazar kam-badan

jo ek qash sangtare ki nashte ki mez se uThaen

to phalon mein ras paDe

jo dhire se zara muskuraen

sara KHandan hans paDe