nasur

sāhab-e-sarvat agar shā'ir nahīñ to ġham nahīñ

shā'iroñ meñ is ko likh kar dene vaale kam nahīñ

note kar ke ḳharch kuchh dīvān ik likhvā.iye

aur naamī publisher se us ko phir chhapvā.iye

she'r paḌhiye yuuñ ki har ik she'r par itrā.iye

niilī piilī Diary har bazm meñ lahrā.iye

kaif-o-mastī is tarah lahje meñ paidā kījiye

lab-kushā hone se pahle paak sharbat pījiye

ye bhī lāzim hai ki mat kiije ziyāda guftugū

taaki ahl-e-'ilm-o-dānish meñ na hoñ be-ābrū

aap ko zar ke 'evaz mad.h-sarā mil jā.eñge

aap kā vo jashn hogā ahl-e-fan hil jā.eñge

ik baḌe sāhib sadārat ke liye haiñ dastyāb

kyūñki p T v meñ ab jaarī nahīñ hai un kī job

achchhe dībācha-faroshoñ kī nahīñ koī kamī

aap ko degī numū in sab ke lafzoñ kī namī

mahñge hotel meñ qalam-kāroñ ko dā'vat dījiye

nāqidoñ se ḳhaas darje kī mohabbat kījiye

rū-numā.ī kījiye aisī ki duniyā dang ho

lāzmī ye hai bikā.ū media bhī sang ho

aap kī ġhazloñ meñ 'umda shā'iroñ kā rang ho

aap ke sarqa-shuda ash'ār par bhī jang ho

mustaqil she'rī jarā.id kī ḳharīdārī kareñ

taaki vo bhī ḳhaas number aap kā jaarī kareñ

apne ḳharche par manā.eñ shaam apne naam kī

aap kī daulat vagarna aap ke kis kaam kī

chhap ga.e do chaar majmū'e agar ik saal meñ

maan leñge aap ko shā'ir sabhī har haal meñ

tazkira vāsif ne likkhā hai kisī nāsūr kā

is ko mat qissa samajhiye shā'ir-e-mash.hūr kā

sahab-e-sarwat agar sha'ir nahin to gham nahin

sha'iron mein is ko likh kar dene wale kam nahin

note kar ke KHarch kuchh diwan ek likhwaiye

aur nami publisher se us ko phir chhapwaiye

she'r paDhiye yun ki har ek she'r par itraiye

nili pili Diary har bazm mein lahraiye

kaif-o-masti is tarah lahje mein paida kijiye

lab-kusha hone se pahle pak sharbat pijiye

ye bhi lazim hai ki mat kije ziyaada guftugu

taki ahl-e-'ilm-o-danish mein na hon be-abru

aap ko zar ke 'ewaz madh-sara mil jaenge

aap ka wo jashn hoga ahl-e-fan hil jaenge

ek baDe sahib sadarat ke liye hain dastyab

kyunki p T w mein ab jari nahin hai un ki job

achchhe dibacha-faroshon ki nahin koi kami

aap ko degi numu in sab ke lafzon ki nami

mahnge hotel mein qalam-karon ko da'wat dijiye

naqidon se KHas darje ki mohabbat kijiye

ru-numai kijiye aisi ki duniya dang ho

lazmi ye hai bikau media bhi sang ho

aap ki ghazlon mein 'umda sha'iron ka rang ho

aap ke sarqa-shuda ash'ar par bhi jang ho

mustaqil she'ri jaraid ki KHaridari karen

taki wo bhi KHas number aap ka jari karen

apne KHarche par manaen sham apne nam ki

aap ki daulat wagarna aap ke kis kaam ki

chhap gae do chaar majmu'e agar ek sal mein

man lenge aap ko sha'ir sabhi har haal mein

tazkira wasif ne likkha hai kisi nasur ka

is ko mat qissa samajhiye sha'ir-e-mashhur ka