nae aadmi ka confession

kabhī ye bhī ḳhvāhish pareshān kartī hai mujh ko

ki maiñ apne bhītar ke maiñ ko nikālūñ

magar mere maiñ kī to sūrat bahut hī burī hai

ḳhabāsat kā ambār jis meñ nihāñ hai

sarāfa se jis kī karāhat ayaañ hai

jabīñ par ḳhatarnāk sochoñ ke jañgal uge haiñ

bhayānak irādoñ ke vahshī chhupe haiñ

nigāhoñ meñ jis kī havasnākiyoñ ke manāzir bhare haiñ

manāzir bhī aise ki jin meñ

zinā aise logoñ ke hamrāh karne ko sochā gayā hai

badan jin ke jinsī bulūġhat ko pahuñche nahīñ haiñ

yā vo jo bulūġhat kī saarī kashish kho chuke haiñ

yā vo jin se koī muqaddas sā rishta juḌā hai

mire maiñ kī sūrat burī hai

ki dandāñ darindoñ kī sūrat

kisī sahme simTe kuñvāre badan meñ gaḌe haiñ

ki mātam-kade meñ bhī āñkheñ kisī jism kī burjiyoñ par Tikī haiñ

ki biivī baġhal meñ magar zehn meñ aur hī koī tan-man khilā hai

ki paglī bhikāran ke tan aur andhe bhikārī ke kashkol par bhī nazar hai

burī hai bahut hī burī hai

ki dil meñ a.izzā kī amvāt kī ḳhvāhisheñ bhī dabī haiñ

ka.ī be-gunah gardaneñ uñgliyoñ meñ phañsī haiñ

ki lafz-e-ayādat meñ bīmār kī maut kī bhī duā hai

burī hai burī hai

ki ahbāb kī jiit par dil dukhī hai

ki aulād kī bartarī se chubhan hai

ki bhaa.ī ke raushan jahāñ se jabīñ par shikan hai

burī hai burī hai

ki jo pāltā hai usī kī nafī hai

ki jo pūjtā hai usī se daġhā hai

ajab ūbaḌ-khābaḌ sī maiñ kī zamīñ hai

ki us meñ kahīñ bhī tavāzun nahīñ hai

kisī bhī tarah kā tanāsub nahīñ hai

jahāñ chāhiye hausla buzdilī hai

jahāñ rāstī kī zarūrat kajī hai

jahāñ chāhiye aman ġhārat-garī hai

jahāñ chāhiye qurb vaañ fāsla hai

jahāñ sulh-e-kul chāhiye garmiyāñ sardiyāñ haiñ

agar mere maiñ kī ye sūrat mire ḳhol kī bāhar sat.h par aa ga.ī

to zamāna mujhe kyā kahegā

yahī soch kar apnī is aarzū ke badan meñ

tabar bhauñk detā huuñ aksar

magar ye tamannā

ki maiñ apne bhītar ke maiñ ko nikālūñ

mire dil meñ rah rah ke kyuuñ jāgtī hai

sabab us kā ye to nahīñ hai

ki maiñ apne andar kī shaffāf makrūh sūrat dikhā kar

zamāne kī āñkhoñ meñ ḳhud ko baḌā dekhnā chāhtā huuñ

yā ye ki musalsal sharāfat ke nāTak se tañg aa chukā huuñ

yā phir ye ki ab

bāharī shakl-o-sūrat meñ merī

kashish koī

baaqī

nahīñ hai

kabhi ye bhi KHwahish pareshan karti hai mujh ko

ki main apne bhitar ke main ko nikalun

magar mere main ki to surat bahut hi buri hai

KHabasat ka ambar jis mein nihan hai

sarafa se jis ki karahat ayan hai

jabin par KHatarnak sochon ke jangal uge hain

bhayanak iradon ke wahshi chhupe hain

nigahon mein jis ki hawasnakiyon ke manazir bhare hain

manazir bhi aise ki jin mein

zina aise logon ke hamrah karne ko socha gaya hai

badan jin ke jinsi bulughat ko pahunche nahin hain

ya wo jo bulughat ki sari kashish kho chuke hain

ya wo jin se koi muqaddas sa rishta juDa hai

mere main ki surat buri hai

ki dandan darindon ki surat

kisi sahme simTe kunware badan mein gaDe hain

ki matam-kade mein bhi aankhen kisi jism ki burjiyon par Tiki hain

ki biwi baghal mein magar zehn mein aur hi koi tan-man khila hai

ki pagli bhikaran ke tan aur andhe bhikari ke kashkol par bhi nazar hai

buri hai bahut hi buri hai

ki dil mein aizza ki amwat ki KHwahishen bhi dabi hain

kai be-gunah gardanen ungliyon mein phansi hain

ki lafz-e-ayaadat mein bimar ki maut ki bhi dua hai

buri hai buri hai

ki ahbab ki jit par dil dukhi hai

ki aulad ki bartari se chubhan hai

ki bhai ke raushan jahan se jabin par shikan hai

buri hai buri hai

ki jo palta hai usi ki nafi hai

ki jo pujta hai usi se dagha hai

ajab ubaD-khabaD si main ki zamin hai

ki us mein kahin bhi tawazun nahin hai

kisi bhi tarah ka tanasub nahin hai

jahan chahiye hausla buzdili hai

jahan rasti ki zarurat kaji hai

jahan chahiye aman ghaarat-gari hai

jahan chahiye qurb wan fasla hai

jahan sulh-e-kul chahiye garmiyan sardiyan hain

agar mere main ki ye surat mere KHol ki bahar sath par aa gai

to zamana mujhe kya kahega

yahi soch kar apni is aarzu ke badan mein

tabar bhaunk deta hun aksar

magar ye tamanna

ki main apne bhitar ke main ko nikalun

mere dil mein rah rah ke kyun jagti hai

sabab us ka ye to nahin hai

ki main apne andar ki shaffaf makruh surat dikha kar

zamane ki aankhon mein KHud ko baDa dekhna chahta hun

ya ye ki musalsal sharafat ke naTak se tang aa chuka hun

ya phir ye ki ab

bahari shakl-o-surat mein meri

kashish koi

baqi

nahin hai