nae sal ki dua

ai na.e saal

tū phir mere nagar meñ aaya

ḳhair-maqdam hai terā

ai na.e saal

magar ye to batā

nafratoñ kā koī gul phir to khilā.egā nahīñ

be-gunāhoñ kā lahū phir to bahā.egā nahīñ

ai na.e saal

tujhe raam kī siitā kī qasam

'mariyam' o 'iisā kī qasam

phir koī ghar na ujaḌne paa.e

sādgī gaañv kī miTTī meñ na milne paa.e

shahr kī god meñ sannāTā na palne paa.e

phir kisī maañ kī na ho māmtā zaḳhmī

na bahan se koī bhaa.ī bichhḌe

chūḌiyāñ saarī suhāgan kī salāmat rakhnā

ai na.e saal

ḳhushī 'iid kī mātam meñ na badle ab ke

koī jamshed-nagar phir na dhuāñ dene lage

phir sulagne na lage zulm-o-'adāvat kī chitā

ai na.e saal agar ab ke bhī

aag aur ḳhuun kī holī hogī

to samajh le koī

ḳhair-maqdam na karegā terā

nām-levā bhī na hogā terā

aur shahnā.ī na gūñjegī kahīñ

kahīñ jaykār kī āvāz nahīñ ubhregī

phir na shahroñ ko sajā.egā koī

tere phir giit na gā.egā koī

ai na.e saal

faqat itnī tamanna hai mirī

apne dāman ko masarrat se basā.e rakhnā

rang se nuur se phūloñ se sajā.e rakhnā

aur har dil meñ

mohabbat ke charāġhoñ ko jalā.e rakhnā

ai nae sal

tu phir mere nagar mein aaya

KHair-maqdam hai tera

ai nae sal

magar ye to bata

nafraton ka koi gul phir to khilaega nahin

be-gunahon ka lahu phir to bahaega nahin

ai nae sal

tujhe ram ki sita ki qasam

'mariyam' o 'isa ki qasam

phir koi ghar na ujaDne pae

sadgi ganw ki miTTi mein na milne pae

shahr ki god mein sannaTa na palne pae

phir kisi man ki na ho mamta zaKHmi

na bahan se koi bhai bichhDe

chuDiyan sari suhagan ki salamat rakhna

ai nae sal

KHushi 'id ki matam mein na badle ab ke

koi jamshed-nagar phir na dhuan dene lage

phir sulagne na lage zulm-o-'adawat ki chita

ai nae sal agar ab ke bhi

aag aur KHun ki holi hogi

to samajh le koi

KHair-maqdam na karega tera

nam-lewa bhi na hoga tera

aur shahnai na gunjegi kahin

kahin jaykar ki aawaz nahin ubhregi

phir na shahron ko sajaega koi

tere phir git na gaega koi

ai nae sal

faqat itni tamanna hai meri

apne daman ko masarrat se basae rakhna

rang se nur se phulon se sajae rakhna

aur har dil mein

mohabbat ke charaghon ko jalae rakhna