نئے سال کی سوغات

میں نئے سال کی سوغات تجھے کیا بھیجوں

اک برہمن نے کہا ہے کہ یہ سال اچھا ہے

مہ وشوں زہرہ جبینوں کا خیال اچھا ہے

یعنی بیتے ہوئے ماضی سے یہ حال اچھا ہے

سرپھروں کے لیے الفت کا وبال اچھا ہے

جتنے ارمان ہیں سینے میں نکال اچھا ہے

رات بھر ذہن اسی فکر میں حیران رہا

تیری زلفوں کی طرح میں بھی پریشان رہا

دل میں اک درد کا چڑھتا ہوا طوفان رہا

خالی خالی سا خیالات کا گلدان رہا

دشت حسرت میں بہت دیر پریشان رہا

کوئی تخلیق کوئی شعر کوئی نظم و غزل

کوئی گلدستۂ افکار خیالوں کا محل

کوئی نغمہ کوئی خوشبو کوئی یادوں کا کنول

کوئی تصویر کوئی خط کوئی اڑتا بادل

پینٹنگ کوئی کوئی آرٹ کا تازہ ماڈل

مشورہ دل کا ہے مہر و مہ و انجم بھیجو

وقت کہتا ہے کہ اب خوشۂ گندم بھیجو