nafi o isbaat

us kā iqrār kar ke

use DhūñDne chal paḌā

shahr meñ dasht meñ

koh o dariyā meñ, maiñ

muddatoñ maarā maarā phirā

lekin us kā nishāñ

merī nazroñ se

ojhal thā ojhal rahā

āḳhirash thak ke jab so gayā

maiñ kisī moḌ par

to mire parda-e-ḳhvāb par

ek tahrīr mujh se

muḳhātib huī is tarah

terā iqrār bilkul bajā hai

magar yaad rakh

ek inkār bhī

juzv-e-lāzim hai

mazkūra iqrār kā

is liye ġhair-mumkin hai takmīl

tere is iqrār kī

jab talak

is kī buniyād qaa.em na ho

juzv-e-inkār par

nā-mukammal hai iqrār jab tak tirā

ġhair-mumkin ki paa.e tū us kā patā!

us ka iqrar kar ke

use DhunDne chal paDa

shahr mein dasht mein

koh o dariya mein, main

muddaton mara mara phira

lekin us ka nishan

meri nazron se

ojhal tha ojhal raha

aaKHirash thak ke jab so gaya

main kisi moD par

to mere parda-e-KHwab par

ek tahrir mujh se

muKHatib hui is tarah

tera iqrar bilkul baja hai

magar yaad rakh

ek inkar bhi

juzw-e-lazim hai

mazkura iqrar ka

is liye ghair-mumkin hai takmil

tere is iqrar ki

jab talak

is ki buniyaad qaem na ho

juzw-e-inkar par

na-mukammal hai iqrar jab tak tera

ghair-mumkin ki pae tu us ka pata!