nagar nagar

tirā dhiyān liye maiñ nagar nagar ghūmā

sharīk-e-hāl thī terī nazar kī pahnā.ī

ki āsmān o samundar jagā diye jis ne

fazā meñ abr ke paikar banā diye jis ne

kabhī jo baiTh gayā maiñ shajar ke saa.e meñ

to mere chehre ko chhūne lagīñ tirī sāñseñ

hazār bāteñ thiiñ pattoñ ke sarsarāne meñ

hazār lams the jis vaqt jhuk ga.iiñ shāḳheñ

dam-e-ġhurūb gayā bazm meñ hasīnoñ kī

bitā.eñ sā.ateñ sohbat meñ nāznīnoñ kī

har aa.ine se jhalaktā tirā gudāz badan

vo jhūlte hue fānūs tere āveze

vo mauj-e-rañg tirā shabnamī sā pairāhan

tujhe pukāregī rātoñ ko merī tanhā.ī

ye bhuuk ruuh kī ye ishtihā-e-be-ārām

jo ek marg-e-musalsal hai ek soz-e-davām

tera dhiyan liye main nagar nagar ghuma

sharik-e-haal thi teri nazar ki pahnai

ki aasman o samundar jaga diye jis ne

faza mein abr ke paikar bana diye jis ne

kabhi jo baiTh gaya main shajar ke sae mein

to mere chehre ko chhune lagin teri sansen

hazar baaten thin patton ke sarsarane mein

hazar lams the jis waqt jhuk gain shaKHen

dam-e-ghurub gaya bazm mein hasinon ki

bitaen saaten sohbat mein nazninon ki

har aaine se jhalakta tera gudaz badan

wo jhulte hue fanus tere aaweze

wo mauj-e-rang tera shabnami sa pairahan

tujhe pukaregi raaton ko meri tanhai

ye bhuk ruh ki ye ishtiha-e-be-aram

jo ek marg-e-musalsal hai ek soz-e-dawam