naghma-e-dil-e-soz

hai mizāj us vaqt kuchh bigḌā huā sayyād kā

ai asīrān-e-qafas mauqa nahīñ fariyād kā

kitnā dard-āmez thā naġhma dil-e-nāshād kā

tiir tarkash meñ taḌap uTThā sitam ījād kā

dāstān-e-ālam-e-furqat kisī se kyā kaheñ

ho gayā barbād har zarra dil-e-nāshād kā

aap ko milnā nahīñ manzūr lo martā huuñ maiñ

muntazir baiThā huā thā aap ke irshād kā

ai dil-e-nāshād mujh ko terī vahshat dekh kar

yaad aa jaatā hai qissa qais aur farhād kā

aa.e vo bahr-ayādat Daal kar ruḳh par naqāb

rah gayā armān dil meñ āshiq-e-nāshād kā

aap farmāte haiñ tū ne raat ko naale kiye

banda-parvar 'auj' tū aadī nahīñ fariyād kā

hai mizaj us waqt kuchh bigDa hua sayyaad ka

ai asiran-e-qafas mauqa nahin fariyaad ka

kitna dard-amez tha naghma dil-e-nashad ka

tir tarkash mein taDap uTTha sitam ijad ka

dastan-e-alam-e-furqat kisi se kya kahen

ho gaya barbaad har zarra dil-e-nashad ka

aap ko milna nahin manzur lo marta hun main

muntazir baiTha hua tha aap ke irshad ka

ai dil-e-nashad mujh ko teri wahshat dekh kar

yaad aa jata hai qissa qais aur farhad ka

aae wo bahr-ayaadat Dal kar ruKH par naqab

rah gaya arman dil mein aashiq-e-nashad ka

aap farmate hain tu ne raat ko nale kiye

banda-parwar 'auj' tu aadi nahin fariyaad ka