naghma-e-watan

chaman kī sar-zamīñ apnī chaman kā āsmāñ apnā

banā.eñ kis liye ik shāḳh-e-gul par āshiyāñ apnā

haiñ is ke ḳhār-o-gul apne ḳhizāñ apnī bahār apnī

bahar-sūrat hameñ mahbūb hai ye gulsitāñ apnā

chaman kī bazm-e-rangā-rang meñ raqsāñ hai yak-rañgī

ki is kā sāz-e-sad-āvāz bhī hai ham-zabāñ apnā

yahāñ parhez kaisā aao rindān-e-vatan aao

ki jaam apnā hai apnā mai-kada pīr-e-muġhāñ apnā

girā.īñ is pe lākhoñ bijliyāñ charḳh-e-sitamgar ne

magar ab bhī tajallī-rez hai jannat-nishāñ apnā

na ab gulchīñ hai ḳhosha-chīñ na vo sayyād jābir hai

jo thā nā-mehrbāñ ab ho rahā hai mehrbāñ apnā

koī is daur meñ begāna ho kar rah nahīñ saktā

ki har ahl-e-chaman 'hindī' hai ḳhud hī pāsbāñ apnā

chaman ki sar-zamin apni chaman ka aasman apna

banaen kis liye ek shaKH-e-gul par aashiyan apna

hain is ke KHar-o-gul apne KHizan apni bahaar apni

bahar-surat hamein mahbub hai ye gulsitan apna

chaman ki bazm-e-ranga-rang mein raqsan hai yak-rangi

ki is ka saz-e-sad-awaz bhi hai ham-zaban apna

yahan parhez kaisa aao rindan-e-watan aao

ki jam apna hai apna mai-kada pir-e-mughan apna

girain is pe lakhon bijliyan charKH-e-sitamgar ne

magar ab bhi tajalli-rez hai jannat-nishan apna

na ab gulchin hai KHosha-chin na wo sayyaad jabir hai

jo tha na-mehrban ab ho raha hai mehrban apna

koi is daur mein begana ho kar rah nahin sakta

ki har ahl-e-chaman 'hindi' hai KHud hi pasban apna