nahin malum

uThā chaman se ye kaisā dhuāñ nahīñ ma.alūm

bachā ki ḳhaak huā āshiyāñ nahīñ ma.alūm

maiñ uḌ ke jā.ūñ to jā.ūñ kahāñ nahīñ ma.alūm

mujhe to ghoñsle kā bhī nishāñ nahīñ ma.alūm

friday ko to mai-ḳhāna band rahtā hai

namāz paḌhtā hai pīr-e-muġhāñ nahīñ ma.alūm

jigar se phephḌe se dil se yā ki gurde se

kahāñ se uThtā hai dard-e-nihāñ nahīñ ma.alūm

maiñ tie bāñdh ke āvāz bhīñch letā huuñ

hisāb to hameñ allah miyāñ nahīñ ma.alūm

adū bhī zinda hai aur maiñ bhī huuñ ba-qaid-e-hayāt

haiñ aap ke liye girya-kunāñ nahīñ ma.alūm

vahī to nikle hai leader jo apnā leader hai

ki vote dene lagīñ ranDiyāñ nahīñ ma.alūm

bahār aane se kyoñ ḳhush hue ye dīvāne

bahār hī meñ nihāñ hai ḳhizāñ nahīñ ma.alūm

hazār laakh bahāne banāo tum lekin

nazar to bhāñp chuke yaar ḳhaañ nahīñ ma.alūm

na aage baḌhtī hai ab tū na pīchhe haTtī hai

kahāñ aTak ga.ī umr-e-ravāñ nahīñ ma.alūm

hamārī qabr ke taḳhte churā ke kahte haiñ

jalāo lakḌī bahut hai girāñ nahīñ ma.alūm

'zarīf' aap sañbhal kar paḌhā kareñ ash.ār

mushā.era meñ haiñ ahl-e-zabāñ nahīñ ma.alūm

uTha chaman se ye kaisa dhuan nahin malum

bacha ki KHak hua aashiyan nahin malum

main uD ke jaun to jaun kahan nahin malum

mujhe to ghonsle ka bhi nishan nahin malum

friday ko to mai-KHana band rahta hai

namaz paDhta hai pir-e-mughan nahin malum

jigar se phephDe se dil se ya ki gurde se

kahan se uThta hai dard-e-nihan nahin malum

main tie bandh ke aawaz bhinch leta hun

hisab to hamein allah miyan nahin malum

adu bhi zinda hai aur main bhi hun ba-qaid-e-hayat

hain aap ke liye girya-kunan nahin malum

wahi to nikle hai leader jo apna leader hai

ki wote dene lagin ranDiyan nahin malum

bahaar aane se kyon KHush hue ye diwane

bahaar hi mein nihan hai KHizan nahin malum

hazar lakh bahane banao tum lekin

nazar to bhanp chuke yar KHan nahin malum

na aage baDhti hai ab tu na pichhe haTti hai

kahan aTak gai umr-e-rawan nahin malum

hamari qabr ke taKHte chura ke kahte hain

jalao lakDi bahut hai giran nahin malum

'zarif' aap sanbhal kar paDha karen ashaar

mushaera mein hain ahl-e-zaban nahin malum