nai bhikaran

har dar pe pahuñch kar ro denā dukh peT kā sab se kah jaanā

jab sāmne aa jaatā hai koī phailā kar haath ko rah jaanā

fāqoñ se hai be-hoshī sī har gaam pe chakkar aate haiñ

paivand-bharī kohna sī ridā paivand bhī udhḌe jaate haiñ

matvālī rasīlī āñkhoñ ke andāz badalte rahte haiñ

kuchh makkhiyāñ bhin bhin kartī haiñ kuchh aañsū chalte rahte haiñ

muñh pher ke aañsū poñchhtī hai ashkoñ meñ ubaal aa jaatā hai

rah rah ke malāl aa jaatā hai kuchh dil meñ ḳhayāl aa jaatā hai

jab dil kī dhaḌkan baḌhtī hai kuchh aur bhī ghabrā jaatī hai

pachhtā pachhtā kar māñgtī hai aur maañg ke pachhtā jaatī hai

hai dard-bharī āvāz meñ ik tarkīb na.ī andāz nayā

phūTī huī qismat chheḌ rahī hai TuuTe dil kā saaz nayā

detā hai agar kuchh bhiik koī lete hue kyā sharmātī hai

ġhairat kā to sar jhuk jaatā hai muhtājī haath baḌhātī hai

buniyād-e-ġhurūr-o-kibr-o-anā ko Thokar se Dhā detī hai

tadbīr kī āḳhir nākāmī taqdīr ko manvā detī hai

kahtī hai ki dekh ai ahl-e-duval muhtājī kī tasvīr huuñ maiñ

jis ḳhvāb ko tū hai dekh rahā us ḳhvāb kī ik ta.abīr huuñ maiñ

har dar pe pahunch kar ro dena dukh peT ka sab se kah jaana

jab samne aa jata hai koi phaila kar hath ko rah jaana

faqon se hai be-hoshi si har gam pe chakkar aate hain

paiwand-bhari kohna si rida paiwand bhi udhDe jate hain

matwali rasili aankhon ke andaz badalte rahte hain

kuchh makkhiyan bhin bhin karti hain kuchh aansu chalte rahte hain

munh pher ke aansu ponchhti hai ashkon mein ubaal aa jata hai

rah rah ke malal aa jata hai kuchh dil mein KHayal aa jata hai

jab dil ki dhaDkan baDhti hai kuchh aur bhi ghabra jati hai

pachhta pachhta kar mangti hai aur mang ke pachhta jati hai

hai dard-bhari aawaz mein ek tarkib nai andaz naya

phuTi hui qismat chheD rahi hai TuTe dil ka saz naya

deta hai agar kuchh bhik koi lete hue kya sharmati hai

ghairat ka to sar jhuk jata hai muhtaji hath baDhati hai

buniyaad-e-ghurur-o-kibr-o-ana ko Thokar se Dha deti hai

tadbir ki aaKHir nakaami taqdir ko manwa deti hai

kahti hai ki dekh ai ahl-e-duwal muhtaji ki taswir hun main

jis KHwab ko tu hai dekh raha us KHwab ki ek tabir hun main