nai duniya mein purana aadmi

nayā din hai

na.e manzar

na.e saa.e

purānā aadmī maiñ

na.ī duniyā meñ rasta DhūñDhtā huuñ

mirī āñkhoñ meñ ab bosīda ḳhvāboñ ke sivā kuchh bhī nahīñ hai

mire hāthoñ ke sab naqshe purāne ho chuke haiñ

in lakīroñ kā

na.ī duniyā kī rāhoñ se koī rishta nahīñ hai

bahut muddat huī ik āshnā āvāz ne mujh se kahā thā

tum agar chāho

to maiñ tum ko rasīle ḳhvāb de duuñ

raushnī ke ḳhvāb

kaif-o-sarḳhushī ke ḳhvāb

aise ḳhvāb jo dukh-dard se mahfūz rakhte haiñ

jinheñ āñkhoñ meñ rakh lene se duniyā ḳhūb-sūrat lagne lagtī hai

magar maiñ ne kahā us se

tum apne ḳhvāb apne paas rakkho

maiñ na.ī duniyā kī jānib jā rahā huuñ

mujhe ḳhvāboñ se kyā maiñ to haqīqat kā pujārī huuñ

ġhurūr-e-āgahī ne mujh ko dīvāna banā rakkhā thā shāyad

agar maiñ vo rasīle ḳhvāb le letā to achchhā thā

haqīqat maut hai vo mujh ko ḳhud hī DhūñD letī

zindagī ḳhvāboñ kā mausam hai

na.ī duniyā meñ lekin mausamī meve bhī mahñge haiñ

agar maiñ vo purāne ḳhvāb le letā to achchhā thā

naya din hai

nae manzar

nae sae

purana aadmi main

nai duniya mein rasta DhunDhta hun

meri aankhon mein ab bosida KHwabon ke siwa kuchh bhi nahin hai

mere hathon ke sab naqshe purane ho chuke hain

in lakiron ka

nai duniya ki rahon se koi rishta nahin hai

bahut muddat hui ek aashna aawaz ne mujh se kaha tha

tum agar chaho

to main tum ko rasile KHwab de dun

raushni ke KHwab

kaif-o-sarKHushi ke KHwab

aise KHwab jo dukh-dard se mahfuz rakhte hain

jinhen aankhon mein rakh lene se duniya KHub-surat lagne lagti hai

magar main ne kaha us se

tum apne KHwab apne pas rakkho

main nai duniya ki jaanib ja raha hun

mujhe KHwabon se kya main to haqiqat ka pujari hun

ghurur-e-agahi ne mujh ko diwana bana rakkha tha shayad

agar main wo rasile KHwab le leta to achchha tha

haqiqat maut hai wo mujh ko KHud hi DhunD leti

zindagi KHwabon ka mausam hai

nai duniya mein lekin mausami mewe bhi mahnge hain

agar main wo purane KHwab le leta to achchha tha