nai ghaTaen utar rahi hain

ye tum na kahnā

kisī se tum ko

kabhī mohabbat nahīñ rahī hai

tumhāre lab par

hikāyat-e-mehr-o-ulfat nahīñ rahī hai

tumhārī āñkhoñ ne ek shab bhī

na koī qurbat kā ḳhvāb dekhā

na ḳhuun meñ iltihāb paayā

na ruuh meñ iztirāb dekhā

ye tum na kahnā

tumhāre ehsās kī zamīñ par

koī na guzrā

badan-darīda ḳhizāñ-rasīda-o-pā-tapīda

salonī rangat kī chāhatoñ ne kabhī na hosh-o-havās luuTe

hatheliyoñ meñ na chāñd utrā na uñgliyoñ se sharār phūTe

jo tum kaho to bas itnā kahnā

tumhārī āñkhoñ ke āñganoñ meñ

na.ī ghaTā.eñ utar rahī haiñ

isī liye to purāne mausam kā koī manzar bachā nahīñ hai

guzishta saa.at kā koī paikar rahā nahīñ hai

ye tum na kahna

kisi se tum ko

kabhi mohabbat nahin rahi hai

tumhaare lab par

hikayat-e-mehr-o-ulfat nahin rahi hai

tumhaari aankhon ne ek shab bhi

na koi qurbat ka KHwab dekha

na KHun mein iltihab paya

na ruh mein iztirab dekha

ye tum na kahna

tumhaare ehsas ki zamin par

koi na guzra

badan-darida KHizan-rasida-o-pa-tapida

saloni rangat ki chahaton ne kabhi na hosh-o-hawas luTe

hatheliyon mein na chand utra na ungliyon se sharar phuTe

jo tum kaho to bas itna kahna

tumhaari aankhon ke aanganon mein

nai ghaTaen utar rahi hain

isi liye to purane mausam ka koi manzar bacha nahin hai

guzishta saat ka koi paikar raha nahin hai