nai justuju ka alamiya

taḳhayyul kī ūñchī uḌānoñ se aage

jahāñ ḳhvāb TuuTe paḌe haiñ

mirī aarzū thī vahāñ jā ke dekhūñ

rafīqoñ raqīboñ ke chehre

mirī har baġhāvat pe hañste rahe haiñ

maiñ raftār ke dā.ere toḌ kar

ḳhudā se pare jā chukā huuñ

farishtoñ kī pahlī baġhāvat kā manzar mujhe yaad aayā

kuchh aisā lagā jaise aadam kā saarā alamiya

na.ī justujū ke sahāre hamesha rahegā

har ik baar bāġhī na.e ban ke

vo dāstāñ phir se dohrā rahe haiñ

ḳhud iblīs hairān hai

ḳhair o shar kī na.ī kashmakash meñ ulajh kar har ik baar ye sochtā hai

''ḳhudāyā! maiñ mazlūm huuñ

merī fitrat meñ jo sar-kashī thī vo aadam se thī

terā banda huuñ aajiz huuñ tū rahm kar

dekh ek muddat se aadam ke beTe

tujhe aur mujhe bhuul kar

sirf be-nām be-sūd se justujū ke sahāre baḌhe jā rahe haiñ

unheñ terī rahmat terā qahr kuchh bhī Darātā nahīñ

mujhe aaj pahlī daf.a Dar lagā hai

kahīñ ye mujhe aur tujhe qaid kar ke

sirf taḳhlīq ke jurm meñ vo sazā deñ

jis ko lākhoñ baras se ye sahte chale aa rahe haiñ!''

taKHayyul ki unchi uDanon se aage

jahan KHwab TuTe paDe hain

meri aarzu thi wahan ja ke dekhun

rafiqon raqibon ke chehre

meri har baghawat pe hanste rahe hain

main raftar ke daere toD kar

KHuda se pare ja chuka hun

farishton ki pahli baghawat ka manzar mujhe yaad aaya

kuchh aisa laga jaise aadam ka sara alamiya

nai justuju ke sahaare hamesha rahega

har ek bar baghi nae ban ke

wo dastan phir se dohra rahe hain

KHud iblis hairan hai

KHair o shar ki nai kashmakash mein ulajh kar har ek bar ye sochta hai

KHudaya! main mazlum hun

meri fitrat mein jo sar-kashi thi wo aadam se thi

tera banda hun aajiz hun tu rahm kar

dekh ek muddat se aadam ke beTe

tujhe aur mujhe bhul kar

sirf be-nam be-sud se justuju ke sahaare baDhe ja rahe hain

unhen teri rahmat tera qahr kuchh bhi Daraata nahin

mujhe aaj pahli dafa Dar laga hai

kahin ye mujhe aur tujhe qaid kar ke

sirf taKHliq ke jurm mein wo saza den

jis ko lakhon baras se ye sahte chale aa rahe hain!