nai nasl ka aaKHri nauha

tulū-e-sub.h-e-fardā kī munādī bhī zarā sun lo

ye atom jab phaTegā to qayāmat chār-sū hogī

tabāhī kū-bakū hogī

kabhī gulshan ke in nau-ḳhez ġhunchoñ kī taraf dekho

ye lāġhar kalmūe nange nigoḌe naunihāloñ kī taraf dekho

zarā socho

ye gandī bastiyāñ hadd-e-gumāñ se bhī kahīñ aage na baḌh jaa.eñ

ye aisā kārvāñ hai jo bahut baḌhtā hī jaatā hai

zarā socho

tumhārī khetiyāñ sonā ugaltī haiñ zamānoñ se

mah-o-anjum ugā sakte ho is dhartī se tum lekin

magar ab bhuuk ugtī hai

abhī tum ḳhvāb ke parcham uḌāte ho

ḳhudā kī rahmatoñ ke giit gaate ho

navāzish jaan kar ḳhushiyāñ manāte ho

kabhī tum an-ginat bhūkī nigāhoñ kī taraf dekho

zarā socho

hazāroñ haath ḳhālī haiñ hazāroñ hote jaate haiñ

ye kaisī bhiiḌ hai jo kārvāñ-dar-kārvāñ kam hī nahīñ hotī

na.e jismoñ ke pairāhan musalsal kaTte jaate haiñ

zarā socho

zamīñ kī vus.ateñ har daur meñ ghaTtī hī jaatī haiñ

nagīne ḳhuun ke

gāḌhe pasīne kī kamā.ī

kahāñ tak munqasim hoñge

qatāreñ baḌhtī jaatī haiñ

zarā socho

makāñ se lā-makāñ tak qahr-e-mustaqbil numāyāñ hai

hujūm-e-be-karāñ ko dekh kar aalam pareshāñ hai

tulūa-e-sub.h-e-fardā kī munādī bhī zarā san lo

ye atom jab phaTegā to qayāmat chār-sū hogī

tabāhī kū-bakū hogī

zarā socho

tulu-e-subh-e-farda ki munadi bhi zara sun lo

ye atom jab phaTega to qayamat chaar-su hogi

tabahi ku-baku hogi

kabhi gulshan ke in nau-KHez ghunchon ki taraf dekho

ye laghar kalmue nange nigoDe naunihaalon ki taraf dekho

zara socho

ye gandi bastiyan hadd-e-guman se bhi kahin aage na baDh jaen

ye aisa karwan hai jo bahut baDhta hi jata hai

zara socho

tumhaari khetiyan sona ugalti hain zamanon se

mah-o-anjum uga sakte ho is dharti se tum lekin

magar ab bhuk ugti hai

abhi tum KHwab ke parcham uDate ho

KHuda ki rahmaton ke git gate ho

nawazish jaan kar KHushiyan manate ho

kabhi tum an-ginat bhuki nigahon ki taraf dekho

zara socho

hazaron hath KHali hain hazaron hote jate hain

ye kaisi bhiD hai jo karwan-dar-karwan kam hi nahin hoti

nae jismon ke pairahan musalsal kaTte jate hain

zara socho

zamin ki wusaten har daur mein ghaTti hi jati hain

nagine KHun ke

gaDhe pasine ki kamai

kahan tak munqasim honge

qataren baDhti jati hain

zara socho

makan se la-makan tak qahr-e-mustaqbil numayan hai

hujum-e-be-karan ko dekh kar aalam pareshan hai

tulua-e-subh-e-farda ki munadi bhi zara san lo

ye atom jab phaTega to qayamat chaar-su hogi

tabahi ku-baku hogi

zara socho