nai nasl ki dua

mere ḳhvāboñ kī ta.abīr se bhī hasīñ

mere ābā-o-ajdād kī sar-zamīñ

mujh ko aise lagā

jaise maiñ terā beTā nahīñ

vo imārāt jo terī azmat kī ik zinda

tasvīr thiiñ

ab khañDar ban chukīñ

har taraf ḳhāmushī aur makḌī ke jaale

har ik shai pe barsoñ se kaa.ī kī tah jam chukī hai

ajab ek pur huuñ sā ye samāñ hai

kahīñ par na ab haiñ nishān paañv ke

jahāñ se ka.ī qāfile manzileñ mārte

na.e daur ke jo payāmī bane the

magar ab vo raste

zamāne kī uḌtī huī gard meñ dab chuke haiñ

na ab ye fazā

un ke ghoḌoñ kī Tāpoñ se hī gūñjtī hai

sadā.eñ

ḳhalāoñ ke andhe kuñ.eñ meñ

kahīñ gum huī haiñ

ki jaise mirā ab kisī shai se bhī koī rishta nahīñ hai

maiñ un ke liye ajnabī huuñ

vo mere liye ajnabī haiñ

maiñ faqat haal ke ek bajre meñ baiThā

samundar kī lahroñ

havāoñ kī samtoñ ke rahm-o-karam par

fazāoñ meñ goyā muallaq huā huuñ

kahīñ duur tak paañv dharne kī ḳhātir zamīñ hī nahīñ hai

ajab zindagī hai

agarche huuñ zinda

magar zinda rahne kī ḳhvāhish nahīñ hai

ai zamīñ

ai zamīñ

mujh pe apne daraḳhshanda maazī ke darvāze vā kar

mirī ḳhālī āñkheñ na.e ḳhvāb se bhar

mujhe lazzat-e-hāl se āshnā kar

mere KHwabon ki tabir se bhi hasin

mere aaba-o-ajdad ki sar-zamin

mujh ko aise laga

jaise main tera beTa nahin

wo imaraat jo teri azmat ki ek zinda

taswir thin

ab khanDar ban chukin

har taraf KHamushi aur makDi ke jale

har ek shai pe barson se kai ki tah jam chuki hai

ajab ek pur hun sa ye saman hai

kahin par na ab hain nishan panw ke

jahan se kai qafile manzilen marte

nae daur ke jo payami bane the

magar ab wo raste

zamane ki uDti hui gard mein dab chuke hain

na ab ye faza

un ke ghoDon ki Tapon se hi gunjti hai

sadaen

KHalaon ke andhe kunen mein

kahin gum hui hain

ki jaise mera ab kisi shai se bhi koi rishta nahin hai

main un ke liye ajnabi hun

wo mere liye ajnabi hain

main faqat haal ke ek bajre mein baiTha

samundar ki lahron

hawaon ki samton ke rahm-o-karam par

fazaon mein goya muallaq hua hun

kahin dur tak panw dharne ki KHatir zamin hi nahin hai

ajab zindagi hai

agarche hun zinda

magar zinda rahne ki KHwahish nahin hai

ai zamin

ai zamin

mujh pe apne daraKHshanda mazi ke darwaze wa kar

meri KHali aankhen nae KHwab se bhar

mujhe lazzat-e-haal se aashna kar