nai nasl

umr us guphā meñ reñg aa.ī hai jahāñ

koī ḳhaar koī kañkarī nahīñ

soñdhī soñdhī giilī giilī baas hai

ḳhudā kī narm narm chhāñv hai

maut kī miThās hai

ḳhudā kī narm narm chhāñv hai

hazār baar laḌ chukā huuñ

ek ek ḳhvāb ke liye

hamāre darmiyāñ jañg ho chukī hai

aaj jab mire liye

sulh kī ghaḌī hai

phir kashākash-e-hayāt kā

nayā sabab khaḌā na kar

merī aañkh dekhne kā har azaab sah chukī hai

mujh ko mat dikhā

mire chahete sāthiyoñ ke qāfile

jo farāz-e-zindagī kī har samt jā rahe the

sañg-bāriyoñ kī zad meñ haiñ

mere kaan har sadā ke zaḳhm khā ke pak chuke haiñ

mujh ko mat sunā

mere ba.ad aane vāloñ ke dukhoñ kī dāstāñ mat sunā

aaj jab mire liye

sulh kī ghaḌī hai

sab dukhoñ kī dhaar kund ho chukī hai

saare saañp bichchhūoñ kā zahr mar chukā hai

ḳhvāb-e-āfrīñ hai

niiñd aa rahī hai mujh ko mat jagā

mujh ko mat dikhā

mujh ko mat sunā

umr us gupha mein reng aai hai jahan

koi KHar koi kankari nahin

sondhi sondhi gili gili bas hai

KHuda ki narm narm chhanw hai

maut ki miThas hai

KHuda ki narm narm chhanw hai

hazar bar laD chuka hun

ek ek KHwab ke liye

hamare darmiyan jang ho chuki hai

aaj jab mere liye

sulh ki ghaDi hai

phir kashakash-e-hayat ka

naya sabab khaDa na kar

meri aankh dekhne ka har azab sah chuki hai

mujh ko mat dikha

mere chahete sathiyon ke qafile

jo faraaz-e-zindagi ki har samt ja rahe the

sang-bariyon ki zad mein hain

mere kan har sada ke zaKHm kha ke pak chuke hain

mujh ko mat suna

mere baad aane walon ke dukhon ki dastan mat suna

aaj jab mere liye

sulh ki ghaDi hai

sab dukhon ki dhaar kund ho chuki hai

sare sanp bichchhuon ka zahr mar chuka hai

KHwab-e-afrin hai

nind aa rahi hai mujh ko mat jaga

mujh ko mat dikha

mujh ko mat suna