nai sadi tujhe shair salam kahta hai

ba-sad-ḳhulūs ba-sad-ehtirām kahtā hai

na.ī sadī tujhe shā.ir salām kahtā hai

tujhe ḳhabar hī nahīñ hai to maiñ ye batlā duuñ

taras rahā hai abhī aadmī ḳhushī ke liye

dil-o-nazar pe añdheroñ kā raaj hai phir bhī

bashar ne yuuñ to jalā.e haiñ āgahī ke diye

har ek dil se añdheroñ ko tū miTā denā

mohabbatoñ ke diye har taraf jalā denā

na.ī sadī tujhe shā.ir salām kahtā hai

na.ī sadī tū hameñ aisā aa.ina de de

ham apne chehre ke dāġhoñ ko ḳhud hī pahchāneñ

parā.e aiboñ pe uñglī uThāne se pahle

ham apne apne garebāñ meñ jhāñk kar dekheñ

ḳhud-ehtisābī kā jazba hameñ mayassar ho

hamārī nazroñ meñ achchhā.iyoñ kā manzar ho

na.ī sadī tujhe shā.ir salām kahtā hai

salīb-o-dār pe sachchā.iyoñ kī lāsheñ haiñ

laboñ pe ḳhauf ke taale lage haiñ logoñ ke

ye kaisā ḳhauf hai chhāyā huā har ik jānib

sañbhal sañbhal ke qadam uTh rahe haiñ logoñ ke

ab is muhīb se ehsās ko haTā denā

diloñ pe taarī hai jo ḳhauf use miTā denā

na.ī sadī tujhe shā.ir salām kahtā hai

ga.ī sadī ne to kyā kyā zalīl-o-ḳhvār kiyā

jo be-gunāh the un ko bhī sangsār kiyā

ḳhudā qubūl kare amn kī duāoñ ko

zamīñ pe ḳhauf ke bādal na ab kabhī chhā.eñ

na koī aag lage barf ke pahāḌoñ meñ

ḳhizāoñ se na gulistāñ ke phuul murjhā.eñ

na.ī sadī nayā mausam na.ī havā denā

mohabbatoñ ke chaman har taraf khilā denā

na.ī sadī tujhe shā.ir salām kahtā hai

ba-sad-KHulus ba-sad-ehtiram kahta hai

nai sadi tujhe shair salam kahta hai

tujhe KHabar hi nahin hai to main ye batla dun

taras raha hai abhi aadmi KHushi ke liye

dil-o-nazar pe andheron ka raj hai phir bhi

bashar ne yun to jalae hain aagahi ke diye

har ek dil se andheron ko tu miTa dena

mohabbaton ke diye har taraf jala dena

nai sadi tujhe shair salam kahta hai

nai sadi tu hamein aisa aaina de de

hum apne chehre ke daghon ko KHud hi pahchanen

parae aibon pe ungli uThane se pahle

hum apne apne gareban mein jhank kar dekhen

KHud-ehtisabi ka jazba hamein mayassar ho

hamari nazron mein achchhaiyon ka manzar ho

nai sadi tujhe shair salam kahta hai

salib-o-dar pe sachchaiyon ki lashen hain

labon pe KHauf ke tale lage hain logon ke

ye kaisa KHauf hai chhaya hua har ek jaanib

sanbhal sanbhal ke qadam uTh rahe hain logon ke

ab is muhib se ehsas ko haTa dena

dilon pe tari hai jo KHauf use miTa dena

nai sadi tujhe shair salam kahta hai

gai sadi ne to kya kya zalil-o-KHwar kiya

jo be-gunah the un ko bhi sangsar kiya

KHuda qubul kare amn ki duaon ko

zamin pe KHauf ke baadal na ab kabhi chhaen

na koi aag lage barf ke pahaDon mein

KHizaon se na gulistan ke phul murjhaen

nai sadi naya mausam nai hawa dena

mohabbaton ke chaman har taraf khila dena

nai sadi tujhe shair salam kahta hai