nai subh

bikhar ga.ī haiñ añdheroñ meñ champa.ī kirneñ

na.e ufuq pe nayā āftāb niklā hai

gajar bajā hai na.ī sub.h kā payām liye

ġham-e-hayāt ke siine kā bojh pighlā hai

na.ī bahār kī dul.han sañvar ke baiThī hai

laboñ pe sub.h-e-banaras kā giit raqsāñ hai

mahak rahe haiñ havāoñ ke reshmī āñchal

ḳhushī ke saaz pe saarā chaman ġhazal-ḳhvāñ hai

nigāh-e-shauq ke sadqe ki ham ne phir ik baar

rah-e-vafā meñ hazāroñ diye jalā.e haiñ

simaT ga.ī haiñ zamāne kī sarhadeñ aise

kabhī jo duur the ham se qarīb aa.e haiñ

dikhā diyā hai zamāne ko ek jaañ ho kar

miTā diyā hai raqīboñ kā har bharam ham ne

banā liyā hai bulandī pe āshiyāñ apnā

Dubo diye haiñ sabhī qahqahoñ meñ ġham ham ne

chalo uTho ki abhī manzileñ bulātī haiñ

baḌhe chalo ki yahī vaqt kā taqāzā hai

'kañval' banā.eñge apne vatan ko ham jannat

yahī hai apnī tamanna yahī irāda hai

bikhar gai hain andheron mein champai kirnen

nae ufuq pe naya aaftab nikla hai

gajar baja hai nai subh ka payam liye

gham-e-hayat ke sine ka bojh pighla hai

nai bahaar ki dulhan sanwar ke baiThi hai

labon pe subh-e-banaras ka git raqsan hai

mahak rahe hain hawaon ke reshmi aanchal

KHushi ke saz pe sara chaman ghazal-KHwan hai

nigah-e-shauq ke sadqe ki hum ne phir ek bar

rah-e-wafa mein hazaron diye jalae hain

simaT gai hain zamane ki sarhaden aise

kabhi jo dur the hum se qarib aae hain

dikha diya hai zamane ko ek jaan ho kar

miTa diya hai raqibon ka har bharam hum ne

bana liya hai bulandi pe aashiyan apna

Dubo diye hain sabhi qahqahon mein gham hum ne

chalo uTho ki abhi manzilen bulati hain

baDhe chalo ki yahi waqt ka taqaza hai

'kanwal' banaenge apne watan ko hum jannat

yahi hai apni tamanna yahi irada hai