nairang-e-tasawwur

sahar kā vaqt hai baiThā huuñ maiñ phūloñ kī mahfil meñ

talātum ḳhez hai mauj-tarannum qulzum dil meñ

jhalaktā hai kisī kā husn firdaus-e-nazar ban kar

kisī ke ashk sabze par machalte haiñ guhar ban kar

koī āvāz detā hai mujhe bulbul ke naġhmoñ meñ

uḌātā hai koī merī hañsī chhup chhup ke phūloñ meñ

kisī kī āh-e-sozāñ kā dhuāñ gardūñ pe raqsāñ hai

kisī kā ḳhūn-e-dil rañg-e-shafaq meñ jalva-afshāñ hai

ḳhamoshī ban ke sar-tā-pā koī baiThā hai sausan meñ

suvaidā ban ke pinhāñ hai koī laale ke dāman meñ

koī shāḳhoñ meñ chhup kar mere aage sar jhukātā hai

mujhe apnī taraf shāyad ishāroñ se bulātā hai

koī merī taraf nargis kī mast āñkhoñ se taktā hai

maiñ kyā jānūñ vo in pardoñ meñ kyā kuchh dekh saktā hai

koī zer-e-shajar sāyoñ kī pariyoñ ko nachātā hai

huā hai yā koī dhīme suroñ meñ giit gaatā hai

koī koyal kī kuukū meñ ye āhista se kahtā hai

tujhe jis kī tamannā hai vo tere dil meñ rahtā hai

ġharaz har chiiz meñ hai us ke jalvoñ kī farāvānī

ayaañ hai zarre zarre se usī ke ruḳh kī tābānī

sahar ka waqt hai baiTha hun main phulon ki mahfil mein

talatum KHez hai mauj-tarannum qulzum dil mein

jhalakta hai kisi ka husn firdaus-e-nazar ban kar

kisi ke ashk sabze par machalte hain guhar ban kar

koi aawaz deta hai mujhe bulbul ke naghmon mein

uData hai koi meri hansi chhup chhup ke phulon mein

kisi ki aah-e-sozan ka dhuan gardun pe raqsan hai

kisi ka KHun-e-dil rang-e-shafaq mein jalwa-afshan hai

KHamoshi ban ke sar-ta-pa koi baiTha hai sausan mein

suwaida ban ke pinhan hai koi lale ke daman mein

koi shaKHon mein chhup kar mere aage sar jhukata hai

mujhe apni taraf shayad ishaaron se bulata hai

koi meri taraf nargis ki mast aankhon se takta hai

main kya jaanun wo in pardon mein kya kuchh dekh sakta hai

koi zer-e-shajar sayon ki pariyon ko nachata hai

hua hai ya koi dhime suron mein git gata hai

koi koyal ki kuku mein ye aahista se kahta hai

tujhe jis ki tamanna hai wo tere dil mein rahta hai

gharaz har chiz mein hai us ke jalwon ki farawani

ayan hai zarre zarre se usi ke ruKH ki tabani