najat

dukhte hue sīnoñ kī ḳhushbū ke hāthoñ meñ

un jalte ḳhvāboñ ke lahrāte koḌe haiñ

jinheñ vo ik gahnā.e chāñd kī nañgī kamar pe barsātī rahtī hai

tīrgī baḌhtī jaatī hai

aur hamārā chāñd abhī tak aisī kohna-sāl havelī kā qaidī hai

jise havā aur bādal ne tāmīr kiyā hai

jis kī giilī dīvāroñ par mañDhī huī beloñ meñ

aisī khopḌiyāñ khiltī haiñ

jin kī āñkhoñ ke ḳhālī halqoñ meñ maazī haal aur mustaqbil ke

gaD-maD rañgoñ ke be-nūr dhundalke jame hue haiñ

tum hī batāo jab shāḳhoñ se

fāḳhatī niile phūloñ kī bajā.e

khopḌiyāñ phūTeñ

sub.h-e-bahār kā sūraj un se aañkh milā kar kaise zinda rah saktā hai

isī liye to is vīrān havelī ke āñgan meñ ḳhizāñ ke naġhme

zinda insānoñ ke nauhe ban kar gūñjte haiñ

nam-ālūd fazā ke nādīda siine par

sabr kī sil kī tarah ruke hue barfīle sūraj

shaam kī ukhḌī huī chaukhaT par

apne sar ghuTnoñ meñ chhupā kar sochte haiñ

kabhī to sadiyoñ kī āvārgiyoñ kā bojh uThā.e koī musāfir

ism-e-rihā.ī ko zer-e-lab dohrāte hue

is be-rañg havelī ke darvāze par

vo dastak dene aa.egā

khul kar bārish barsegī aur chāñd rihā ho jā.egā

dukhte hue sinon ki KHushbu ke hathon mein

un jalte KHwabon ke lahraate koDe hain

jinhen wo ek gahnae chand ki nangi kamar pe barsati rahti hai

tirgi baDhti jati hai

aur hamara chand abhi tak aisi kohna-sal haweli ka qaidi hai

jise hawa aur baadal ne tamir kiya hai

jis ki gili diwaron par manDhi hui belon mein

aisi khopDiyan khilti hain

jin ki aankhon ke KHali halqon mein mazi haal aur mustaqbil ke

gaD-maD rangon ke be-nur dhundalke jame hue hain

tum hi batao jab shaKHon se

faKHati nile phulon ki bajae

khopDiyan phuTen

subh-e-bahaar ka suraj un se aankh mila kar kaise zinda rah sakta hai

isi liye to is viran haweli ke aangan mein KHizan ke naghme

zinda insanon ke nauhe ban kar gunjte hain

nam-alud faza ke nadida sine par

sabr ki sil ki tarah ruke hue barfile suraj

sham ki ukhDi hui chaukhaT par

apne sar ghuTnon mein chhupa kar sochte hain

kabhi to sadiyon ki aawargiyon ka bojh uThae koi musafir

ism-e-rihai ko zer-e-lab dohraate hue

is be-rang haweli ke darwaze par

wo dastak dene aaega

khul kar barish barsegi aur chand riha ho jaega