namak napaid hai nayab hai

umīdoñ ārzūoñ ḳhvāboñ ko mismār kartā sochtā huuñ maiñ

ye mere dast-o-bāzū haiñ

kisī tā'mīr se pahle huī taḳhrīb ke hāmil kabhī the jo

safar darpesh ye kaisā

kahāñ par aa gayā huuñ maiñ

makānoñ ke badan ko ruuh se mahrūm kartā huuñ

ye aa.heñ siskiyāñ chīḳheñ

khañDar par baal bikhrā.e

kahīñ dīvāngī kā raqs kartī haiñ

kahīñ par qahqahe bhī khankhanāte haiñ

ye taḳht-o-tāj kā nashsha

ḳhirad ko chhīn letā hai

ki jab bāzār-e-tāqat meñ manāt-o-lāt aur 'uzzā

badal kar māhiyat u’lu hubal kā vird karte haiñ

to arzānī lahū kī chhūne lagtī hai falak ko

ye nashsha joñk kī sūrat

re’āyā kī sadāoñ kā lahū piitā

badan se lipTā rahtā hai

namak laao

namak laa.eñ kahāñ se ki

namak nāpaid hai nāyāb hai is qaht-sālī meñ

ijāra-dārī us kī taḳht-e-shāhī ke liye mahfūz hai ab

umidon aarzuon KHwabon ko mismar karta sochta hun main

ye mere dast-o-bazu hain

kisi ta'mir se pahle hui taKHrib ke hamil kabhi the jo

safar darpesh ye kaisa

kahan par aa gaya hun main

makanon ke badan ko ruh se mahrum karta hun

ye aahen siskiyan chiKHen

khanDar par baal bikhrae

kahin diwangi ka raqs karti hain

kahin par qahqahe bhi khankhanate hain

ye taKHt-o-taj ka nashsha

KHirad ko chhin leta hai

ki jab bazar-e-taqat mein manat-o-lat aur 'uzza

badal kar mahiyat u’lu hubal ka wird karte hain

to arzani lahu ki chhune lagti hai falak ko

ye nashsha jonk ki surat

re’aya ki sadaon ka lahu pita

badan se lipTa rahta hai

namak lao

namak laen kahan se ki

namak napaid hai nayab hai is qaht-sali mein

ijara-dari us ki taKHt-e-shahi ke liye mahfuz hai ab