nanha pauda

garche paudā abhī huñ chhoTā sā

aarzū dil meñ hai mire kyā kyā

aa hī jā.egī rut javānī kī

ya.anī mujh par bhī shādmānī kī

Daalī Daalī mirī harī hogī

aur phal phuul se bharī hogī

faiz hogā jahāñ meñ aam mirā

ḳhidmat-e-ḳhalq hogā kaam mirā

saarī chiḌiyoñ ko maiñ bulā.ūñgā

ḳhuub meve unheñ khilā.ūñgā

ghoñsle mujh pe vo banā.eñgī

raag chheḌeñgī chahchahā.eñgī

jo bhī aa.egā un kā karne shikār

mere pattoñ kī dekhegā dīvār

garmiyoñ meñ musāfir ā.eñge

mere saa.e meñ chain pā.eñge

bachche ā.eñge jhūlā jhūleñge

giit gā ke ḳhushī meñ phūleñge

vo chalā.eñge mujh pe jab patthar

is ke badle maiñ in ko dūñgā samar

ek ḳhvāhish hai aur dil meñ baḌī

kaash vo bhī kare ḳhudā puurī

suukh jā.ūñ to lakḌiyoñ se mirī

ḳhūbsūrat sī ik bane kursī

us pe baiThe faqat vahī laḌkā

jis ke sar meñ ho ilm kā saudā

dil meñ apne jo maiñ ne Thānī hai

us kī ye muḳhtasar kahānī hai

maiñ bhī bachcha huuñ tum bhī bachche ho

maiñ bhī sachchā huuñ tum bhī sachche ho

kyā banāyā hai zindagī kā plaan

maiñ to rakhtā huuñ tum se nek gumān

aaj chhoTe ho kal jo hoge javāñ

kaun se kaam tum karoge yahāñ

garche pauda abhi hun chhoTa sa

aarzu dil mein hai mere kya kya

aa hi jaegi rut jawani ki

yani mujh par bhi shadmani ki

Dali Dali meri hari hogi

aur phal phul se bhari hogi

faiz hoga jahan mein aam mera

KHidmat-e-KHalq hoga kaam mera

sari chiDiyon ko main bulaunga

KHub mewe unhen khilaunga

ghonsle mujh pe wo banaengi

rag chheDengi chahchahaengi

jo bhi aaega un ka karne shikar

mere patton ki dekhega diwar

garmiyon mein musafir aaenge

mere sae mein chain paenge

bachche aaenge jhula jhulenge

git ga ke KHushi mein phulenge

wo chalaenge mujh pe jab patthar

is ke badle main in ko dunga samar

ek KHwahish hai aur dil mein baDi

kash wo bhi kare KHuda puri

sukh jaun to lakDiyon se meri

KHubsurat si ek bane kursi

us pe baiThe faqat wahi laDka

jis ke sar mein ho ilm ka sauda

dil mein apne jo main ne Thani hai

us ki ye muKHtasar kahani hai

main bhi bachcha hun tum bhi bachche ho

main bhi sachcha hun tum bhi sachche ho

kya banaya hai zindagi ka plan

main to rakhta hun tum se nek guman

aaj chhoTe ho kal jo hoge jawan

kaun se kaam tum karoge yahan