nannhi munni chiDiyan

koī in ko pakaḌ nahīñ saktā

uḌ ke jaan apnī ye bachātī haiñ

baiTh kar alganī pe ḳhush ho kar

par khujātī haiñ dum hilātī haiñ

kaam ke vaqt kartī haiñ ye kaam

kaam se muñh nahīñ churātī haiñ

baiTh kar khūñTiyoñ pe chhīñkoñ par

apnī chuuñ chuuñ hameñ sunātī haiñ

khel ke vaqt kheltī haiñ ye

mil ke ūdham bahut machātī haiñ

jab basere kā vaqt hotā hai

ek tūfān sā uThātī haiñ

shaam ko jam.a ho ke peḌoñ par

ġhul machātī ḳhushī manātī haiñ

raat aur niiñd aatī hai jis dam

chupkī peḌoñ pe baiTh jaatī haiñ

phir paroñ meñ chhupā ke choñchoñ ko

niiñd ke ye maze uḌātī haiñ

uTh ke taḌke phir apnī chuuñ chuuñ se

apne mālik ke giit gaatī haiñ

koi in ko pakaD nahin sakta

uD ke jaan apni ye bachati hain

baiTh kar algani pe KHush ho kar

par khujati hain dum hilati hain

kaam ke waqt karti hain ye kaam

kaam se munh nahin churaati hain

baiTh kar khunTiyon pe chhinkon par

apni chun chun hamein sunati hain

khel ke waqt khelti hain ye

mil ke udham bahut machati hain

jab basere ka waqt hota hai

ek tufan sa uThati hain

sham ko jama ho ke peDon par

ghul machati KHushi manati hain

raat aur nind aati hai jis dam

chupki peDon pe baiTh jati hain

phir paron mein chhupa ke chonchon ko

nind ke ye maze uDati hain

uTh ke taDke phir apni chun chun se

apne malik ke git gati hain