naqqad

rahm ai naqqād-e-fan ye kyā sitam kartā hai tū

koī nok-e-ḳhār se chhūtā hai nabz-e-rañg-o-bū

shā.erī aur mantaqī bahseñ ye kaisā qatl-e-ām

bursh-e-miqrāz kā detā hai zulfoñ ko payām

kyuuñ uThā hai jins-e-shā.er ke parakhne ke liye

kyā shamīm-e-sumbul-o-nasrīñ hai chakhne ke liye

ai adab nā-āshnā ye bhī nahīñ tujh ko ḳhayāl

nañg hai bazm-e-suḳhan meñ madrase kī qīl-o-qāl

mantaqī kāñTe pe rakhtā hai kalām-e-dil-pazīr

kaash is nukte ko samjhe terī tab-e-harf-gīr

yaanī ik lai se lab-e-nāqid ko khulnā chāhiye

pañkhuḌī par qatra-e-shabnam ko tulnā chāhiye

sher-fahmī ke liye haiñ jo sharā.it be-ḳhabar

soch tū puurā utartā bhī hai us me.aar par

jalte dekhā hai kabhī hastī ke dil kā tū ne daaġh

aañch se jis kī ġhizā paatā hai shā.er kā dimāġh

dil se apne pūchh o zindāni-e-ilm-e-kitāb

husn-e-qudarat ko bhī dekhā hai bar-afganda-naqāb

tū patā asrār-e-hastī kā lagātā hai kabhī

ālam-e-mahsūs se bāhar bhī jaatā hai kabhī

kyā vahāñ bhī uḌ ke pahuñchā hai kabhī ai nukta-chīñ

kāñptā hai jis fazā meñ shahpar rūh-ul-amīñ

ḳhāmushī kī naġhma-rezī par bhī sar dhuntā hai tū

qalb-e-fitrat ke dhaḌakne kī sadā suntā hai tū

ab butoñ kī bazm meñ tū bhī huā hai bāryāb

ḳhaak ko parchhā.iyāñ jin kī banātī haiñ gulāb

jo tabassum chhīn lete haiñ shab-e-mahtāb se

jin kī barnā.ī jagātī hai diloñ ko ḳhvāb se

sach batā tū bhī hai kyā ai kushta-e-sad-hirs-o-āz

rāz-dān-e-kākul-e-shab-rañg o chashm-e-nīm-bāz

terī nabzoñ meñ bhī machlī hai kabhī bijlī kī rau

soz-e-ġham se terā dil bhī kyā kabhī detā hai lau

sach batā ai āshiq-e-derīna-e-fikr-e-ma.āsh

zahr meñ tiryāk ke unsur kī bhī kī hai talāsh

mujh se āñkheñ to milā ai dushman-e-soz-o-gudāz

tujh pe kyā azdād kī tauhīd kā ifshā hai raaz

terī rātoñ kī siyāhī meñ bhī ai zulmat-ma.āb

kyā kabhī taal.e huā hai muskurā kar āftāb

tū gayā bhī hai nigār-e-ġham kī mahmil ke qarīb

aañch sī mahsūs hotī hī kabhī dil ke qarīb

taur-e-ma.anī par bhī ai nā-faham chaḌh saktā hai tū

kyā musannif kī kitāb-e-dil bhī paḌh saktā hai tū

ye nahīñ to pher le āñkheñ ye jalva aur hai

terī duniyā aur hai shā.er kī duniyā aur hai

sher kī tahlīl se pahle mirī taqrīr sun

ḳhud zabān-e-sher se aa sher kī tafsīr sun

dil meñ jab ash.ār kī hotī hai bārish be-shumār

nutq par būñdeñ Tapak paḌtī haiñ kuchh be-iḳhtiyār

Dhaal letī hai jinheñ shā.er kī tarkīb-e-adab

Dhal ke go vo gauhar-e-ġhaltāñ kā paatī haiñ laqab

aur hotī haiñ tajallī-baḳhsh tāj-e-zar-fishāñ

phir bhī vo shā.er kī nazroñ meñ haiñ ḳhālī sīpiyāñ

jin ke asrār-e-daraḳhshāñ ruuh kī mahfil meñ haiñ

sīpiyāñ haiñ nutq kī maujoñ pe motī dil meñ haiñ

shā.erī kā ḳhānamāñ hai nutq kā luuTā huā

us kā shīsha hai zabāñ kī Thes se TuuTā huā

chhā.e rahte haiñ jo shā.er ke dil-e-sarshār par

TuuT kar aate haiñ vo naġhme lab-e-guftār par

jāgte rahte haiñ dil kī mahfil-e-ḳhāmosh meñ

band kar lete haiñ āñkheñ nutq ke āġhosh meñ

log jin kī jāñ-gudāzī se haiñ dil pakḌe hue

khokhle naġhme haiñ vo auzān meñ jakḌe hue

sher ho jaatā hai sirf ik jumbish-e-lab se niDhāl

saañs kī garmī se paḌ jaatā hai is shīshe meñ baal

jaam meñ aate hī uḌ jaatī hai shā.er kī sharāb

TuuT jaatā hai kināre aate aate ye hubāb

is se baḌh kar aur ho saktī hai kyā hairat kī baat

sher ko samjhā agar shā.er kī tū ne kā.enāt

sher kiyā jazb-e-darūñ kā ek naqsh-e-nā-tamām

mushtaba sā ik ishāra ek mub.ham sā kalām

kaif meñ ik ''laġhzish-e-pā'' click-e-gauhar-bār kī

''iztirārī ek jumbish sii'' lab-e-guftār kī

''ek saut-e-ḳhasta-o-mauhūm sāz-e-zauq kii''

''murta.ish sī ek āvāz'' intihā-e-shauq kī

be-haqīqat nai ke andar zamzama dā.ūd kā

āriz-e-mahdūd par ik aks lā-mahdūd kā

'sher' kyā aql o junūñ kī mushtarak bazm-e-jamāl

'sher' kyā hai ishq o hikmat kā maqām-e-ittisāl

zulmat-e-ib.hām meñ parchhā.īñ tafsīlāt kī

pech o ḳham khāte bagūle meñ chamak zarrāt kī

jū-e-qudarat kī ravānī dasht-e-masnūāt meñ

TūTnā rañgīñ sitāre kā añdherī raat meñ

sher kyā hai niim bedārī meñ bahnā mauj kā

barg-e-gul par niiñd meñ shabnam ke girne kī sadā

tar-zabānī aur ḳhāmoshī kī mub.ham guftugū

lafz o ma.anī meñ tavāzun kī nahufta aarzū

bādaloñ se māh-e-nau kī ik uchaTtī sī ziyā

jhāñknā qatre ke rauzan se urūs-e-bahr kā

mar ke bhī tū shā.erī kā bhed pā saktā nahīñ

aql meñ ye mas.ala nāzuk hai aa saktā nahīñ

tū samajhtā thā jo kahnā chāhiye thā kah gayā

pūchh shā.er se ki vo kyā kah sakā kyā rah gayā

kaun samjhe sher ye kaise haiñ aur kaise nahīñ

dil samajhtā hai ki jaise dil meñ the vaise nahīñ

rahm ai naqqad-e-fan ye kya sitam karta hai tu

koi nok-e-KHar se chhuta hai nabz-e-rang-o-bu

shaeri aur mantaqi bahsen ye kaisa qatl-e-am

bursh-e-miqraaz ka deta hai zulfon ko payam

kyun uTha hai jins-e-shaer ke parakhne ke liye

kya shamim-e-sumbul-o-nasrin hai chakhne ke liye

ai adab na-ashna ye bhi nahin tujh ko KHayal

nang hai bazm-e-suKHan mein madrase ki qil-o-qal

mantaqi kanTe pe rakhta hai kalam-e-dil-pazir

kash is nukte ko samjhe teri tab-e-harf-gir

yani ek lai se lab-e-naqid ko khulna chahiye

pankhuDi par qatra-e-shabnam ko tulna chahiye

sher-fahmi ke liye hain jo sharait be-KHabar

soch tu pura utarta bhi hai us mear par

jalte dekha hai kabhi hasti ke dil ka tu ne dagh

aanch se jis ki ghiza pata hai shaer ka dimagh

dil se apne puchh o zindani-e-ilm-e-kitab

husn-e-qudarat ko bhi dekha hai bar-afganda-naqab

tu pata asrar-e-hasti ka lagata hai kabhi

aalam-e-mahsus se bahar bhi jata hai kabhi

kya wahan bhi uD ke pahuncha hai kabhi ai nukta-chin

kanpta hai jis faza mein shahpar ruh-ul-amin

KHamushi ki naghma-rezi par bhi sar dhunta hai tu

qalb-e-fitrat ke dhaDakne ki sada sunta hai tu

ab buton ki bazm mein tu bhi hua hai baryab

KHak ko parchhaiyan jin ki banati hain gulab

jo tabassum chhin lete hain shab-e-mahtab se

jin ki barnai jagati hai dilon ko KHwab se

sach bata tu bhi hai kya ai kushta-e-sad-hirs-o-az

raaz-dan-e-kakul-e-shab-rang o chashm-e-nim-baz

teri nabzon mein bhi machli hai kabhi bijli ki rau

soz-e-gham se tera dil bhi kya kabhi deta hai lau

sach bata ai aashiq-e-derina-e-fikr-e-maash

zahr mein tiryak ke unsur ki bhi ki hai talash

mujh se aankhen to mila ai dushman-e-soz-o-gudaz

tujh pe kya azdad ki tauhid ka ifsha hai raaz

teri raaton ki siyahi mein bhi ai zulmat-maab

kya kabhi tale hua hai muskura kar aaftab

tu gaya bhi hai nigar-e-gham ki mahmil ke qarib

aanch si mahsus hoti hi kabhi dil ke qarib

taur-e-mani par bhi ai na-faham chaDh sakta hai tu

kya musannif ki kitab-e-dil bhi paDh sakta hai tu

ye nahin to pher le aankhen ye jalwa aur hai

teri duniya aur hai shaer ki duniya aur hai

sher ki tahlil se pahle meri taqrir sun

KHud zaban-e-sher se aa sher ki tafsir sun

dil mein jab ashaar ki hoti hai barish be-shumar

nutq par bunden Tapak paDti hain kuchh be-iKHtiyar

Dhaal leti hai jinhen shaer ki tarkib-e-adab

Dhal ke go wo gauhar-e-ghaltan ka pati hain laqab

aur hoti hain tajalli-baKHsh taj-e-zar-fishan

phir bhi wo shaer ki nazron mein hain KHali sipiyan

jin ke asrar-e-daraKHshan ruh ki mahfil mein hain

sipiyan hain nutq ki maujon pe moti dil mein hain

shaeri ka KHanaman hai nutq ka luTa hua

us ka shisha hai zaban ki Thes se TuTa hua

chhae rahte hain jo shaer ke dil-e-sarshaar par

TuT kar aate hain wo naghme lab-e-guftar par

jagte rahte hain dil ki mahfil-e-KHamosh mein

band kar lete hain aankhen nutq ke aaghosh mein

log jin ki jaan-gudazi se hain dil pakDe hue

khokhle naghme hain wo auzan mein jakDe hue

sher ho jata hai sirf ek jumbish-e-lab se niDhaal

sans ki garmi se paD jata hai is shishe mein baal

jam mein aate hi uD jati hai shaer ki sharab

TuT jata hai kinare aate aate ye hubab

is se baDh kar aur ho sakti hai kya hairat ki baat

sher ko samjha agar shaer ki tu ne kaenat

sher kiya jazb-e-darun ka ek naqsh-e-na-tamam

mushtaba sa ek ishaara ek mubham sa kalam

kaif mein ek laghzish-e-pa click-e-gauhar-bar ki

iztirari ek jumbish si lab-e-guftar ki

ek saut-e-KHasta-o-mauhum saz-e-zauq ki

murtaish si ek aawaz intiha-e-shauq ki

be-haqiqat nai ke andar zamzama daud ka

aariz-e-mahdud par ek aks la-mahdud ka

'sher' kya aql o junun ki mushtarak bazm-e-jamal

'sher' kya hai ishq o hikmat ka maqam-e-ittisal

zulmat-e-ibham mein parchhain tafsilat ki

pech o KHam khate bagule mein chamak zarraat ki

ju-e-qudarat ki rawani dasht-e-masnuat mein

TuTna rangin sitare ka andheri raat mein

sher kya hai nim bedari mein bahna mauj ka

barg-e-gul par nind mein shabnam ke girne ki sada

tar-zabani aur KHamoshi ki mubham guftugu

lafz o mani mein tawazun ki nahufta aarzu

baadalon se mah-e-nau ki ek uchaTti si ziya

jhankna qatre ke rauzan se urus-e-bahr ka

mar ke bhi tu shaeri ka bhed pa sakta nahin

aql mein ye masala nazuk hai aa sakta nahin

tu samajhta tha jo kahna chahiye tha kah gaya

puchh shaer se ki wo kya kah saka kya rah gaya

kaun samjhe sher ye kaise hain aur kaise nahin

dil samajhta hai ki jaise dil mein the waise nahin