naqsh-e-faryaadi

vaa.e nādāriyāñ haa.e majbūriyāñ

rasm-o-ādāb ke bas meñ hai zindagī

ġhair kī ho ke pardes jaatī ho tum

hasrat-o-yās-o-hirmāñ meñ Duubī huī

jaise shādāb sī jhiil meñ ik kañval

chaḌhte sūraj kī tezī se kumlā.e hai

yā ba-ahd-e-bahārāñ kisī ik sabab

jaise phūloñ se rañgat utar jaa.e hai

har sahelī tabassum-ba-lab hai magar

tum hī maġhmūm ho tum hī ḳhāmosh ho

jaise gulchīñ kā saare chaman-zār meñ

ik kalī par hī kuchh zulm ho dosh ho

ḳhāmushī sad zabān-o-bayāñ kī tarah

apnī duniyā ke dukh dard kahtī huī

phir bhī apnoñ se begāngī sī liye

vaqt kī dhaar par naav bahtī huī

vo udāsī ki hūroñ ko afsos ho

hoñ farishte bhī aisī fazā meñ ḳhajil

aur kis kis ko ai 'daur' ilzām duuñ

kuchh pasījā to hogā ḳhudā kā bhī dil

wae nadariyan hae majburiyan

rasm-o-adab ke bas mein hai zindagi

ghair ki ho ke pardes jati ho tum

hasrat-o-yas-o-hirman mein Dubi hui

jaise shadab si jhil mein ek kanwal

chaDhte suraj ki tezi se kumlae hai

ya ba-ahd-e-bahaaran kisi ek sabab

jaise phulon se rangat utar jae hai

har saheli tabassum-ba-lab hai magar

tum hi maghmum ho tum hi KHamosh ho

jaise gulchin ka sare chaman-zar mein

ek kali par hi kuchh zulm ho dosh ho

KHamushi sad zaban-o-bayan ki tarah

apni duniya ke dukh dard kahti hui

phir bhi apnon se begangi si liye

waqt ki dhaar par naw bahti hui

wo udasi ki huron ko afsos ho

hon farishte bhi aisi faza mein KHajil

aur kis kis ko ai 'daur' ilzam dun

kuchh pasija to hoga KHuda ka bhi dil