naqsh-e-mohabbat

vo parda rū-e-pur-anvār se uThā na sake

ham apne so.e hue baḳht ko jagā na sake

taḌap taḌap ke to bismil ne jaan tak de dī

vo āb-e-teġh ke do ghūñT bhī pilā na sake

hamārī un kī mohabbat rahī isī sūrat

udhar baḌhā na sake ham idhar ghaTā na sake

hazār valvale maujūd the tabī.at meñ

magar jab un se milī aañkh bhī milā na sake

nazar milāte hī saaqī ne kar diyā be-ḳhud

pilā.ī aisī ki phir hosh meñ ham aa na sake

na pūchh qissa-e-be-chārgī-e-ishq na pūchh

ye raaz vo hai kisī ko jo ham batā na sake

janāb-e-'nūr' hameñ to miTā diyā lekin

hamāre naqsh-e-mohabbat ko vo miTā na sake

wo parda ru-e-pur-anwar se uTha na sake

hum apne soe hue baKHt ko jaga na sake

taDap taDap ke to bismil ne jaan tak de di

wo aab-e-tegh ke do ghunT bhi pila na sake

hamari un ki mohabbat rahi isi surat

udhar baDha na sake hum idhar ghaTa na sake

hazar walwale maujud the tabiat mein

magar jab un se mili aankh bhi mila na sake

nazar milate hi saqi ne kar diya be-KHud

pilai aisi ki phir hosh mein hum aa na sake

na puchh qissa-e-be-chaargi-e-ishq na puchh

ye raaz wo hai kisi ko jo hum bata na sake

janab-e-'nur' hamein to miTa diya lekin

hamare naqsh-e-mohabbat ko wo miTa na sake