nargis fatima dekh rahi hai

sūraj kā darvāza khultā hai

raat kī kālak se kajlā.ī

miTTī kā chehra utrā hai

nargis fātima taaza qabr kī khiḌkī khol ke

jhāñk rahī hai

maut kī pahlī sub.h kā manzar

afsurda hai

qabristān ko jaane vaale raste par

vīrānī ke sannāTe haiñ

ham-sā.ī qabroñ meñ jaise

kafūrī sakte kā nauha phail chukā hai

duur kahīñ duniyā ke siine meñ

sāñsoñ kā lohā

kundan karne vaale

umr-e-azīz ke halq meñ

siskī kā ik chhallā TuuT gayā hai

māhir surgeon

bāñhoñ meñ nākāmī kā ḳhamyāza bhar kar

soch rahā hai

kār-e-masīhā.ī kā da.avā

jis lamhe ījād huā thā

vo saa.at

insānī vaqt ke hisse meñ aa paa.ī nahīñ

be-samtī kī zard lakīroñ par chalnā dānā.ī nahīñ

nabbāzī ke nashtar se bhī

maut kā patthar nokīlā hai

nargis fātima dekh rahī hai

operation theatre ke andar

surgeon kī mazbūt āñkhoñ ne kamzorī se Tek lagā kar

harakat karnā chhoḌ diyā hai

suraj ka darwaza khulta hai

raat ki kalak se kajlai

miTTi ka chehra utra hai

nargis fatima taza qabr ki khiDki khol ke

jhank rahi hai

maut ki pahli subh ka manzar

afsurda hai

qabristan ko jaane wale raste par

virani ke sannaTe hain

ham-sai qabron mein jaise

kafuri sakte ka nauha phail chuka hai

dur kahin duniya ke sine mein

sanson ka loha

kundan karne wale

umr-e-aziz ke halq mein

siski ka ek chhalla TuT gaya hai

mahir surgeon

banhon mein nakaami ka KHamyaza bhar kar

soch raha hai

kar-e-masihai ka dawa

jis lamhe ijad hua tha

wo saat

insani waqt ke hisse mein aa pai nahin

be-samti ki zard lakiron par chalna danai nahin

nabbazi ke nashtar se bhi

maut ka patthar nokila hai

nargis fatima dekh rahi hai

operation theatre ke andar

surgeon ki mazbut aankhon ne kamzori se Tek laga kar

harakat karna chhoD diya hai