nasab-zade

purānī baat hai

lekin ye anhonī sī lagtī hai

vo jab paidā hue

un ke qabīle ne

ka.ī rāteñ

mubārak sā.atoñ ke jashn meñ kāTīñ

ḳhudā kī bartarī ke giit gaa.e

aur ġhulāmoñ bāñdiyoñ ko qaid se āzād kar Daalā

ka.ī din un ke ḳheme

chīḳhtī ḳhushiyoñ kā gahvāra rahe

un ke buzurgoñ ne

ġharīboñ aur mohtājoñ ko

jins be-bahā bāñTī

bahut se jānvar zab.h kiye

saare qabīle ne

ka.ī din tak

kuoñ se Dol khīñche

rāh-gīroñ kī duā.eñ liiñ

vo sab nau-zāidoñ ko god meñ le kar

rajaz gaate

salaf ke kārnāmoñ kā bayāñ karte

vo jab paidā hue

farḳhanda tāle.a the

magar ik din

nasab-zādoñ ne

apne astabal khole

sabā-raftār ghoḌoñ ke badan par chābukeñ mārīñ

havā ke dosh par neze uchhāle

nek tīnat tā.ifoñ kī bastiyāñ tārāj kar aa.e

vo pahlī raat thī

un ke qabīle kī koī aurat

nasab-bardār apne shauharoñ kī god meñ aa kar nahīñ soī

purani baat hai

lekin ye anhoni si lagti hai

wo jab paida hue

un ke qabile ne

kai raaten

mubarak saaton ke jashn mein kaTin

KHuda ki bartari ke git gae

aur ghulamon bandiyon ko qaid se aazad kar Dala

kai din un ke KHeme

chiKHti KHushiyon ka gahwara rahe

un ke buzurgon ne

gharibon aur mohtajon ko

jins be-baha banTi

bahut se jaanwar zabh kiye

sare qabile ne

kai din tak

kuon se Dol khinche

rah-giron ki duaen lin

wo sab nau-zaidon ko god mein le kar

rajaz gate

salaf ke karnamon ka bayan karte

wo jab paida hue

farKHanda talea the

magar ek din

nasab-zadon ne

apne astabal khole

saba-raftar ghoDon ke badan par chabuken marin

hawa ke dosh par neze uchhaale

nek tinat taifon ki bastiyan taraj kar aae

wo pahli raat thi

un ke qabile ki koi aurat

nasab-bardar apne shauharon ki god mein aa kar nahin soi