nashr-gah

faqat apne hone kā elaan maiñ ne kiyā

par na sochā

kahāñ se chalā thā kahāñ aa ke Thahrā

maiñ kis manzil-e-be-nishāñ kī taraf ab ravāñ huuñ

mujhe ḳhushk bad-rañg chamḌe pe likkhe savāloñ se raġhbat

nahīñ thī

maiñ mantiq kī varzish se ḳhud ko thakānā nahīñ chāhtā thā

faqat apne hone kā elaan maiñ ne kiyā

aur dekhā

falak kī siyah gahrī sūkhī huī bā.ulī se

karoḌoñ sitāre

shuāoñ kī be-samt be-lafz gūñgī zabāñ meñ

larazte laboñ se

na hone ke munkir the

hone kā elaan karte chale jā rahe the

faqat apne hone kā elaan maiñ ne kiyā

aur betāb phūloñ se sāvan ke jhūloñ se

chiḌiyoñ ke lorī se

har zinda hastī ke sāñsoñ kī Dorī se

āvāz aa.ī

mujhe apne hone kā haqq-ul-yaqīñ hai

maiñ elaan kartī huuñ apnā

ajab silsila thā

karoḌoñ baras kī masāfat pe phailā huā saarā aalam

sadāoñ kī lahroñ kī ik chīḳhtī nashr-gah ban chukā thā

faqat apne hone kā elaan kartā chalā jā rahā thā

ye elaan kis ke liye thā

tujhe kyā ḳhabar hai

tū is nashr-gah kā faqat ek adnā mulāzim

tū kuchh bhī nahīñ jāntā hai

faqat apne hone ka elan main ne kiya

par na socha

kahan se chala tha kahan aa ke Thahra

main kis manzil-e-be-nishan ki taraf ab rawan hun

mujhe KHushk bad-rang chamDe pe likkhe sawalon se raghbat

nahin thi

main mantiq ki warzish se KHud ko thakana nahin chahta tha

faqat apne hone ka elan main ne kiya

aur dekha

falak ki siyah gahri sukhi hui bauli se

karoDon sitare

shuaon ki be-samt be-lafz gungi zaban mein

larazte labon se

na hone ke munkir the

hone ka elan karte chale ja rahe the

faqat apne hone ka elan main ne kiya

aur betab phulon se sawan ke jhulon se

chiDiyon ke lori se

har zinda hasti ke sanson ki Dori se

aawaz aai

mujhe apne hone ka haqq-ul-yaqin hai

main elan karti hun apna

ajab silsila tha

karoDon baras ki masafat pe phaila hua sara aalam

sadaon ki lahron ki ek chiKHti nashr-gah ban chuka tha

faqat apne hone ka elan karta chala ja raha tha

ye elan kis ke liye tha

tujhe kya KHabar hai

tu is nashr-gah ka faqat ek adna mulazim

tu kuchh bhi nahin jaanta hai