nasim-e-sahar

kis naaz kis adā se nasīm-e-sahar chalī

bū kī tarah ravāñ huī misl-e-nazar chalī

bāġhoñ kā ruḳh kiyā to girātī samar chalī

shabnam kī pattiyoñ ko luTātī guhar chalī

phūloñ ke jaam bāda-e-mastī se bhar chalī

ahl-e-chaman ko ḳhvāb se bedār kar chalī

rū-e-chaman ko dekh ke zīnat machal paḌī

sabze ko chheḌ-chhāḌ ke lahrā ke chal paḌī

taḳhte guloñ ke chashm-e-zadan meñ khilā chalī

ḳhushbū ke aur shamīm ke dariyā bahā chalī

sajde meñ shukr ke liye shāḳheñ jhukā chalī

chiḌiyoñ ko shāḳh shāḳh pe jhūlā jhulā chalī

pattoñ ko laḌkhaḌātī huī jā-ba-jā chalī

bazm-e-tarab kā rañg chaman meñ jamā chalī

sumbul ko zulf-e-nāz ko suljhā ke chal paḌī

dāman ko ḳhaar ḳhaar se uljhā ke chal paḌī

kis naz kis ada se nasim-e-sahar chali

bu ki tarah rawan hui misl-e-nazar chali

baghon ka ruKH kiya to giraati samar chali

shabnam ki pattiyon ko luTati guhar chali

phulon ke jam baada-e-masti se bhar chali

ahl-e-chaman ko KHwab se bedar kar chali

ru-e-chaman ko dekh ke zinat machal paDi

sabze ko chheD-chhaD ke lahra ke chal paDi

taKHte gulon ke chashm-e-zadan mein khila chali

KHushbu ke aur shamim ke dariya baha chali

sajde mein shukr ke liye shaKHen jhuka chali

chiDiyon ko shaKH shaKH pe jhula jhula chali

patton ko laDkhaDati hui ja-ba-ja chali

bazm-e-tarab ka rang chaman mein jama chali

sumbul ko zulf-e-naz ko suljha ke chal paDi

daman ko KHar KHar se uljha ke chal paDi