nasl-e-be-chehr-gan

apnī be-chehragī

oT meñ naam kī taḳhtiyoñ kī rahī

dil kī tārīkiyāñ

jagmagāhaT meñ malbūs kī chhup ga.iiñ

lab pe tanvīr jaagī

to ham ne ye samjhā

chalo ajnabī ab shanāsā hue

shahr ke ūñche mīnār par

chand miTTī ke rangīñ kabūtar saje

jashn-e-āzādī-e-qaum-o-millat

manāyā gayā

ik ḳhalā darmiyāñ thā

so qaa.em rahā

garmī barsāt jaaḌe kī badlī rutoñ meñ

har ik fard

pahchān apnī gañvā kar

Dhalā mom kī mūratoñ meñ

har ik shakl ab jaise apnī lage

aur koī shakl apnī nahīñ

ham hue aaj ḳhud apne hī shahr meñ

nasl-e-nang-e-nishāñ

nasl-e-be-chehr-gāñ

apni be-chehragi

oT mein nam ki taKHtiyon ki rahi

dil ki tarikiyan

jagmagahaT mein malbus ki chhup gain

lab pe tanwir jagi

to hum ne ye samjha

chalo ajnabi ab shanasa hue

shahr ke unche minar par

chand miTTi ke rangin kabutar saje

jashn-e-azadi-e-qaum-o-millat

manaya gaya

ek KHala darmiyan tha

so qaem raha

garmi barsat jaDe ki badli ruton mein

har ek fard

pahchan apni ganwa kar

Dhala mom ki muraton mein

har ek shakl ab jaise apni lage

aur koi shakl apni nahin

hum hue aaj KHud apne hi shahr mein

nasl-e-nang-e-nishan

nasl-e-be-chehr-gan