nasri nazm ki manzum katha

aur phir kuchh yuuñ huā

lafz kī takrār se

murta.ish iz.hār se

uqda-e-dushvār se

shā.irī uktā ga.ī

shā.irī kī be-karāñ mauj-e-taḳhayyul yuuñ uThī

tañgnā-e-nazm-o-naġhma gum huī

imtiyāz-e-bahr-o-bar miTtā gayā

ehtimām-e-zauq-tar jaatā rahā

chashma-e-vahm-o-gumāñ

phūTtā hai vādī-e-ijz-e-bayāañ ke vast se

phailtī hai ḳhīrgī

lamha-e-mākūs hai

āb-jū-e-ḳhvāb hai paiham ravāñ

jhiil sūrat harf sākit haiñ magar

jhilmilāte haiñ ma.ānī lafz ke tālāb meñ

baat gahrī hai bahut

saaz bhī ḳhāmosh hai

gunjalak sanjog se

maujib-e-nā-guftanī

qābil-e-iz.hār hai

haañ magar vo sheriyat

duur ik lāya.aniyat ke be-amāñ pātāl meñ

barsar-e-paikār hai

aur phir kuchh yun hua

lafz ki takrar se

murtaish izhaar se

uqda-e-dushwar se

shairi ukta gai

shairi ki be-karan mauj-e-taKHayyul yun uThi

tangna-e-nazm-o-naghma gum hui

imtiyaz-e-bahr-o-bar miTta gaya

ehtimam-e-zauq-tar jata raha

chashma-e-wahm-o-guman

phuTta hai wadi-e-ijz-e-bayaan ke wast se

phailti hai KHirgi

lamha-e-makus hai

aab-ju-e-KHwab hai paiham rawan

jhil surat harf sakit hain magar

jhilmilate hain maani lafz ke talab mein

baat gahri hai bahut

saz bhi KHamosh hai

gunjalak sanjog se

maujib-e-na-guftani

qabil-e-izhaar hai

han magar wo sheriyat

dur ek layaniyat ke be-aman patal mein

barsar-e-paikar hai