nauha

vahī bādaloñ ke barasne ke din the

magar vo na barse

mubārak ho shūrā kī san.at-garī ko

mashaqqat se bījoñ ko tayyār kar ke

ugaa.ī thī sahrā meñ chūhoñ kī khetī

jo āhista āhista baḌhte rahe

phir khaḌe ho ga.e apnī dum ke sahāre

katarne lage aise pyāsī zabānoñ ke nauhe jo mashkoñ ke

andar amānat paḌe the

ḳhabāsat ne ugle the manhūs bhūtoñ ke lashkar

ki chūhoñ kī imdād karte hue nuur kī bastiyoñ meñ vo dāḳhil hue

jo uḌāte the gard o ġhubār apne sar par

phaTe tabal kā shor girtā thā dil par

bhayānak sadāoñ meñ baazū uThā kar

chalāne lage raqs meñ tez paañv

ta.affun meñ lipTe hue saañs chhoḌe

baḌhe kichkachāte hue daañt apne hazāroñ taraf se

farishtoñ ne dekhā to ghabrā ga.e aur ḳhasta pyāloñ ko retī se bhar kar

sukaḌne lage apne ḳhemoñ kī jānib

vo retī ke zarre jinheñ aab sūraj kī kirnoñ ne dī thī

magar vo na barse

vahī bādaloñ ke barasne ke din the

wahi baadalon ke barasne ke din the

magar wo na barse

mubarak ho shura ki sanat-gari ko

mashaqqat se bijon ko tayyar kar ke

ugai thi sahra mein chuhon ki kheti

jo aahista aahista baDhte rahe

phir khaDe ho gae apni dum ke sahaare

katarne lage aise pyasi zabanon ke nauhe jo mashkon ke

andar amanat paDe the

KHabasat ne ugle the manhus bhuton ke lashkar

ki chuhon ki imdad karte hue nur ki bastiyon mein wo daKHil hue

jo uDate the gard o ghubar apne sar par

phaTe tabal ka shor girta tha dil par

bhayanak sadaon mein bazu uTha kar

chalane lage raqs mein tez panw

taffun mein lipTe hue sans chhoDe

baDhe kichkachate hue dant apne hazaron taraf se

farishton ne dekha to ghabra gae aur KHasta pyalon ko reti se bhar kar

sukaDne lage apne KHemon ki jaanib

wo reti ke zarre jinhen aab suraj ki kirnon ne di thi

magar wo na barse

wahi baadalon ke barasne ke din the