nawa-e-paira-e-kar-gah-e-shisha-gari

tilism-e-saut jis kā naam thā phir vo guphā aa.ī

thakan kī niiñd jaisī gungunātī jhūmtī

ThanDī havā aa.ī

jahān-e-shor-o-shar lekin

kisī ko chain se kab sone detā hai

sadā.eñ kitnī unmal

ek lā-yānī tasalsul meñ

tarāne ishtihārī chahchahe qavvāliyāñ

aqvāl-e-zarrīñ dialogue ash.ār nā-mauzūñ

pukāreñ māñjhiyoñ ke giit

phir sattyam sharan singham sharan dhammam sharan meñ

jā rahā huuñ meñ

surīle shor kā rath baan kahtā hai

vo nairañg mazāhir kā khulā showcase

sotā rah gayā kaise

tabhī bedār suunā manch be-sāmān-o-gumān

ik duur kī āvāz se gūñjā

kisī goshe se ik nau-umr ḳhush-ilhān qaarī kī sadā aa.ī

sunāyā jā rahā thā yūsuf-e-siddīq kā qissa

gudāz-e-jāvedāñ meñ

an-likhī jātak kathāoñ ke

vuhūsh-o-tair

latā.eñ megh-dūt ashjār

ye insāñ bhī ajab hai

zamānoñ se use ham

jānte pahchānte haiñ

rāz-e-sar-basta magar us kā

vahī jaane jo hai tasvīr-gar us kā

sadāqat hī kā saarā khel hai bhayyā

isī se ek zarra rū-kash-o-mehr-o-mah-o-aḳhtar

sadāqat jiine marne TūTne juḌne ulajhne dar guzarne kī

kahāñ hai

huvaidā ek lauh-e-sañg jis par

ubhar aa.e vo aivān-e-madā.in ke khañDar ā.īna-e-ibrat

kahāñ kī khusravī āzādgī sarmastī-o-shoḳhī

vahī andhā kuaañ ḳhannās sautele ravayya kā

guzarte qāfiloñ kī āhaToñ se duur

jaras kī baañg se mahjūr

nahīñ ye zyādtī hai hosh meñ aao

koī yuuñ kufr biktā hai

idhar dekho

havā zindāñ kī kyā hai kyā banā detī hai insāñ ko

agar zindāñ ho qazzāqoñ uThā.ī ġhairoñ kā maskan

vo zindāñ aur hai lekin

nasheman-gīr arbāb-e-himam jis meñ

vahī to ḳhūb-tar mahbūb-tar us kī nigāhoñ meñ hai

aise jashn-e-dāvat ḳhvān-e-ne.amat hai

jahāñ us kī tulūa sub.h-e-sādiq sī numūd

ik aaj kā mohara

bisāt-e-bazm kī raunaq

salāḳhoñ meñ muqaffal yā salāḳhoñ paar

khulī duniyā meñ jo aisā mubarrā

muāsir illatoñ se

zāhir-o-bātin salāmat hai

vahī lā-raib dārā-e-karāmat hai navā-pairā

tilism-e-saut jis ka nam tha phir wo gupha aai

thakan ki nind jaisi gungunati jhumti

ThanDi hawa aai

jahan-e-shor-o-shar lekin

kisi ko chain se kab sone deta hai

sadaen kitni unmal

ek la-yani tasalsul mein

tarane ishtihaari chahchahe qawwaliyan

aqwal-e-zarrin dialogue ashaar na-mauzun

pukaren manjhiyon ke git

phir sattyam sharan singham sharan dhammam sharan mein

ja raha hun mein

surile shor ka rath ban kahta hai

wo nairang mazahir ka khula showcase

sota rah gaya kaise

tabhi bedar suna manch be-saman-o-guman

ek dur ki aawaz se gunja

kisi goshe se ek nau-umr KHush-ilhan qari ki sada aai

sunaya ja raha tha yusuf-e-siddiq ka qissa

gudaz-e-jawedan mein

an-likhi jatak kathaon ke

wuhush-o-tair

lataen megh-dut ashjar

ye insan bhi ajab hai

zamanon se use hum

jaante pahchante hain

raaz-e-sar-basta magar us ka

wahi jaane jo hai taswir-gar us ka

sadaqat hi ka sara khel hai bhayya

isi se ek zarra ru-kash-o-mehr-o-mah-o-aKHtar

sadaqat jine marne TuTne juDne ulajhne dar guzarne ki

kahan hai

huwaida ek lauh-e-sang jis par

ubhar aae wo aiwan-e-madain ke khanDar aaina-e-ibrat

kahan ki khusrawi aazadgi sarmasti-o-shoKHi

wahi andha kuan KHannas sautele rawayya ka

guzarte qafilon ki aahaTon se dur

jaras ki bang se mahjur

nahin ye zyaadti hai hosh mein aao

koi yun kufr bikta hai

idhar dekho

hawa zindan ki kya hai kya bana deti hai insan ko

agar zindan ho qazzaqon uThai ghairon ka maskan

wo zindan aur hai lekin

nasheman-gir arbab-e-himam jis mein

wahi to KHub-tar mahbub-tar us ki nigahon mein hai

aise jashn-e-dawat KHwan-e-neamat hai

jahan us ki tulua subh-e-sadiq si numud

ek aaj ka mohara

bisat-e-bazm ki raunaq

salaKHon mein muqaffal ya salaKHon par

khuli duniya mein jo aisa mubarra

muasir illaton se

zahir-o-baatin salamat hai

wahi la-raib dara-e-karamat hai nawa-paira