nawa-e-sarosh

mere dil ke ḳharābe meñ

ek jahannum hai

jis meñ jhuuT phailāne vāloñ ko

binā sazā sunā.e hī dhakel diyā jaatā hai

ki mere dil ke maidān meñ koī roz-e-mahshar nahīñ lagegā

na koī hisāb hogā na koī kitāb

na tumhārī apnī nekī tumhāre kaam aa saktī hai

na kisī aur kī du'ā tumheñ bachā saktī hai

apnī ḳhudī kī ḳhudā maiñ ḳhud huuñ

mere jahān-e-man kā har faya-kūn

mujh fard-e-junūñ ke kun se nikaltā hai

mere nizām-e-shaḳhsī meñ har sayyāra-o-sitāra

mujh fard-e-vāhid ke hukm par chaltā hai

mere vajūd ke kaun-o-makāñ kā

koī aglā jahān nahīñ

merī ḳhirad kī fasīloñ par

kisī an-dekhī duniyā kā gumāñ nahīñ

mere nizām-e-shaḳhsī kī kashish-e-siql kā naam

sach hai

aur sachchā.ī meñ her-pher karne vāloñ kā Thikāna

maut hai

vo maut jis ke baa'd dubāra zinda hone kā imkāñ to kyā

gumāñ bhī mumkin nahīñ

aur zindagī

zindagī mere jahān kī vo ne'mat hai

jise tum chaah kar bhī jhuTlā nahīñ sakte

ki mere jahān-e-man meñ

ek tumhārī chāhat hai

aur ek merī

tum chāhte ho vo ho jo tumhārī chāhat hai

magar hogā vahī jo merī chāhat hai

ki mere dil ke jangal kā koī pattā bhī

mere hukm ke baġhair nahīñ hiltā

mere dil ke KHarabe mein

ek jahannum hai

jis mein jhuT phailane walon ko

bina saza sunae hi dhakel diya jata hai

ki mere dil ke maidan mein koi roz-e-mahshar nahin lagega

na koi hisab hoga na koi kitab

na tumhaari apni neki tumhaare kaam aa sakti hai

na kisi aur ki du'a tumhein bacha sakti hai

apni KHudi ki KHuda main KHud hun

mere jahan-e-man ka har faya-kun

mujh fard-e-junun ke kun se nikalta hai

mere nizam-e-shaKHsi mein har sayyara-o-sitara

mujh fard-e-wahid ke hukm par chalta hai

mere wajud ke kaun-o-makan ka

koi agla jahan nahin

meri KHirad ki fasilon par

kisi an-dekhi duniya ka guman nahin

mere nizam-e-shaKHsi ki kashish-e-siql ka nam

sach hai

aur sachchai mein her-pher karne walon ka Thikana

maut hai

wo maut jis ke ba'd dubara zinda hone ka imkan to kya

guman bhi mumkin nahin

aur zindagi

zindagi mere jahan ki wo ne'mat hai

jise tum chah kar bhi jhuTla nahin sakte

ki mere jahan-e-man mein

ek tumhaari chahat hai

aur ek meri

tum chahte ho wo ho jo tumhaari chahat hai

magar hoga wahi jo meri chahat hai

ki mere dil ke jangal ka koi patta bhi

mere hukm ke baghair nahin hilta