naya adab

haañ to maiñ aap se kahtā thā janāb

zindagī jabr kī pāband nahīñ rah saktī

aur naddī usī dhāre pe nahīñ bah saktī

jis meñ maazī kī chitāoñ ke sivā

jis meñ marghaT kī havāoñ ke sivā

aur to kuchh bhī nahīñ kuchh bhī nahīñ hai shāyad

aap be-kār mirī baat pe jhunjhlāte haiñ

kaun kahtā hai ki maazī ko burā kahtā huuñ

maiñ kahūñ ye kisī dushman ne uḌaa.ī hogī

maiñ to kahtā huuñ ki tārīḳh ke siine se sharāre le kar

apnī duniyā ke ḳhas-o-ḳhār jalā hī dūñgā

zindagī ke sabhī aqdār samajh letā huuñ

'mīr' aur 'dard' ke ash.ār samajh letā huuñ

maiñ ne us sham.a kī lo aur baḌhā hī dī hai

apne māhaul meñ ġhālib ne jalāyā thā jise

maiñ to iqbāl kī azmat kī qasam khātā huuñ

aap be-kār mirī baat pe jhunjhlāte haiñ

baat itnī hai ki maiñ un kī hī buniyādoñ par

ik na.e ahd kī taqdīr banāne ke liye

ik na.e vaqt kī tasvīr banāne ke liye

kuchh na.e saaz bajā letā huuñ

maiñ pujārī huuñ mohabbat ke usūloñ kā magar

ishqīya sher mujhe yaad nahīñ

jin meñ seThoñ ko navāboñ ko mazā aatā hai

jin ko pāzeb kī jhankār nigal jaatī hai

mujh ko masnūī mohabbat nahīñ bhātī lekin

maiñ ne insān kī pastī kā nishāñ dekh liyā

kār-ḳhānoñ kā dhuāñ dekh liyā

saikḌoñ saa.e bhaTakte hue larzāñ tarsāñ

baal uljhe hue māthe pe lakīreñ raqsāñ

apne kāñdhe pe uThā.e hue tārīḳh kā bojh

apne hāthoñ se chalāte hue tahzīb kī naav

bhuuk se paañv to uThte nahīñ par uThte haiñ

aur mālik kī tijorī hai bharī jaatī hai

ek mālik ke hazāroñ haiñ ġhulām

jis tarah saikḌoñ bandoñ kā faqat ek ḳhudā

aur usī ek hī mālik kā vajūd

aur usī ek ḳhudā kā paikar

haañ to maiñ aap se kahtā thā janāb

lījiye aap to muñh phir chuke so bhī ga.e

han to main aap se kahta tha janab

zindagi jabr ki paband nahin rah sakti

aur naddi usi dhaare pe nahin bah sakti

jis mein mazi ki chitaon ke siwa

jis mein marghaT ki hawaon ke siwa

aur to kuchh bhi nahin kuchh bhi nahin hai shayad

aap be-kar meri baat pe jhunjhlate hain

kaun kahta hai ki mazi ko bura kahta hun

main kahun ye kisi dushman ne uDai hogi

main to kahta hun ki tariKH ke sine se sharare le kar

apni duniya ke KHas-o-KHar jala hi dunga

zindagi ke sabhi aqdar samajh leta hun

'mir' aur 'dard' ke ashaar samajh leta hun

main ne us shama ki lo aur baDha hi di hai

apne mahaul mein ghaalib ne jalaya tha jise

main to iqbaal ki azmat ki qasam khata hun

aap be-kar meri baat pe jhunjhlate hain

baat itni hai ki main un ki hi buniyaadon par

ek nae ahd ki taqdir banane ke liye

ek nae waqt ki taswir banane ke liye

kuchh nae saz baja leta hun

main pujari hun mohabbat ke usulon ka magar

ishqiya sher mujhe yaad nahin

jin mein seThon ko nawabon ko maza aata hai

jin ko pazeb ki jhankar nigal jati hai

mujh ko masnui mohabbat nahin bhati lekin

main ne insan ki pasti ka nishan dekh liya

kar-KHanon ka dhuan dekh liya

saikDon sae bhaTakte hue larzan tarsan

baal uljhe hue mathe pe lakiren raqsan

apne kandhe pe uThae hue tariKH ka bojh

apne hathon se chalate hue tahzib ki naw

bhuk se panw to uThte nahin par uThte hain

aur malik ki tijori hai bhari jati hai

ek malik ke hazaron hain ghulam

jis tarah saikDon bandon ka faqat ek KHuda

aur usi ek hi malik ka wajud

aur usi ek KHuda ka paikar

han to main aap se kahta tha janab

lijiye aap to munh phir chuke so bhi gae